ಕುಂದಾಪುರಾಂತ್ ಸಾಂತ್ ಜುಜೆ ವಾಜ್ ವಾರ್ಷಿಕ್ ಮಹಾ ಪರಬ್

Published On : 18 Jan 2016 | Reported By : Bernard J Costa

ಕುಂದಾಪುರ್,ಜ.18: ಸುಮಾರ್ 300 ವರ್ಷಾಂ ಪಯ್ಲೆಂ ಕುಂದಾಪುರ್ ಆಸ್ ಪಾಸ್ ಸೇವಾ ದಿಲ್ಲೊ, ತಶೆಂ ಕುಂದಾಪುರಾಂತ್ ಆಸ್ತಾಂ ಮಾಗ್ಣ್ಯಾ ವೇಳಾರ್ ಧರ್ಣಿ ಥಾವ್ನ್ ವ್ಹಯ್ರ್ ಉಭಾರ್ನ್ ವಾರ್ಯಾರ್ ಉಭ್ಲೊ ಭಾಗೆವಂತ್, ಪಾಟ್ಲ್ಯಾ ವರ್ಷಾ ಸಾಂತಾಚಿ ಪದ್ವಿ ಜೊಡಲ್ಯಾ ಸಾಂತ್ ಜುಜೆ ವಾಜಾಚಿ ವಾರ್ಷಿಕ್ ಮಹಾ ಪರಬ್ ‘ಸಾಂತ್ ಜುಜೆ ವಾಜ್,ದಯಾಳಾಯೆಚೊ ದೂತ್’ ಮ್ಹಳ್ಯಾ ಧ್ಯೇಯ್ ವಾಕ್ಯಾಖಾಲ್ ಕುಂದಾಪುರ್ ರೊಜಾರ್ ಮಾಯೆಚ್ಯಾ ಇಗರ್ಜೆ ಚಲ್ಲಿ.

ಇಗರ್ಜೆಚ್ಯಾ ಉಗ್ತ್ಯಾ ಮೈದಾನಾರ್ ಅಧಿಕ್ ಮಾನಾಧಿಕ್ ಬಿಸ್ಪ್ ದೊತೊರ್ ಜೆರಾಲ್ಡ್ ಐಸಾಕ್ ಲೋಬೊ ಹಾಂಚ್ಯಾ ಪ್ರಧಾನ್ ಯಾಜಕ್ಪಣಾ ಖಾಲ್ ಸಂಭ್ರಮಿಕ್ ಬಲಿದಾನ್ ಭೆಟಯ್ಲೆಂ. ಕುಂದಾಪುರ್ ವಾರಾಡೊ ವಿಗಾರ್ ವಾರ್ ಮಾ|ಬಾಪ್ ಅನೀಲ್ ಸೋಜ್, ವಾರಾಡ್ಯಾಚೆಂ ಅನೇಕ್ ಯಾಜಕ್ , ಸಯ್ರೆ ಯಾಜಕ್, ಧರ್ಮ್ ಭಯ್ಣ್ಯೊ ಆನಿ ವಾರಾಡ್ಯಾಚ್ಯಾ ಹರ್ಯೇಕ್ ಫಿರ್ಗಜೆಚ್ಯಾ ಹಜಾರೊಂ ಭಕ್ತಿಕಾಂನಿ ಹ್ಯಾ ಪರ್ಬೆ ಬಲಿದಾನಂತ್ ವಾಂಟೊ ಘೆತ್ಲೊ.

“ಕುಂದಾಪುರ್ ವಾರಾಡೊ ಭಾಗಿ, ಕಿತ್ಯಾಕ್ ಮ್ಹಳ್ಯಾರ್ ಹಾಂಗಾಸರ್ ಅನೇಕ್ ಪವಿತ್ರ್ ಧರ್ಮ್ ಕೆಂದ್ರಾ ಆಸಾತ್, ಸಾಂತ್ ಜುಜೆ ವಾಜಾನ್ ಸೇವಾ ದಿಂವ್ನ್, ಅಶ್ಚಯೆಚ್ಯಾ ಘಟನಾಕ್ ಕಾರಣ್ ಜಾಲ್ಯಾ ಹ್ಯಾ ಜಾಗ್ಯಾರ್ ಆನಿ ಮುಖಾರ್ ಹರ್ಯೇಕ್ ವರ್ಸಾಂ ಪರಬ್ ಚಲಾಜೆ ಆನಿ ಭಕ್ತಿಕಾನಿಂ ಆನಿಕಿ ಚಡ್ ಜಾವ್ನ್ ಹ್ಯಾ ಪರ್ಬೆಕ್ ಮೆಳಾಜೆ’ ಮ್ಹಣನ್ ಬಿಸ್ಪಾನ್ ಉಲೊ ದಿಲೊ.

ಮಾ|ಬಾ|ಆಲ್ವಿನ್ ಡಿಕುನ್ಹಾ ಹಾಣಿ ಸಾಂತ್ ಜುಜೆ ವಾಜಾಚ್ಯಾ ಜಿಣಿಯೆ ವಿಶಿಂ ಕಳವ್ನ್ ಸಾಂತ್ ಜುಜೆ ವಾಜ್ ದಯಾಳ್ ಜಾವ್ನಾಸ್ಲೊ, ತಾಣೆ ತಾಚ್ಯಾ ದುಸ್ಮಾನಾಕ್ ಭೊಗ್ಶಿಲೆಂ ತಾಚಿಂ ದೆಖ್ ಘೆಂವ್ನ್ ಆಮಿ ದಯಾಳಾಯೆಚೆಂ ಮನಿಸ್ ಜಾವ್ನ್ ಜಿಯೆಂವ್ಯಾ’ ಮ್ಹಣನ್ ಪ್ರಸಂಗ್ ದಿಲೊ.

ಉಡುಪಿ ದಿಯೆಸೆಜ್ ನವಿ ಜಾಲ್ಯಾನ್ ವಾರಾಡ್ಯಾಚೆಂ ಪಾತ್ರೊನ್ ಬದಲ್ಯಾತ್ ದೆಕುನ್ ಕುಂದಾಪುರ್ ವಾರಾಡೊ ಆತಾಂ ಅಧಿಕ್ರತ್ ಜಾಂವ್ನ್ ಸಾಂತ್ ಜುಜೆ ವಾರಾಡೊ ಮ್ಹಣನ್ ಬಿಸ್ಪಾನ್ ಅಧಿಕ್ರತ್ ಥರಾನ್ ವ್ಹಡ್ ಕೊವ್ಳೊ ಉಗ್ತಾವಣ ಕರ್ಚ್ಯಾ ಮರಿಪಾತ್ ಘೋಶಣ್ ಕೆಲೆಂ.

ಎಲ್.ಜೆ.ಫೆರ್ನಾಂಡಿಸಾನ್ ಕಾರ್ಯೆ ನಿರ್ವಹಣ್ ಕೆಲೆಂ, ವಾರಾಡೊ ಕಾರ್ಯದರ್ಶಿ ಲೀನಾ ತಾವ್ರೊನ್ ಧನ್ಯವಾದ್ ಪಾಟಯ್ಲೆಂ.