ಕುಂದಾಪುರ್ ಕೊವೆಂತಾತ್ ಕಾರ್ಮಿಣ್ ಸಾಯ್ಬಿಣಿಚೆ ಫೆಸ್ತ್ ಆಚರಣ್

Published On : 16 Jul 2016 | Reported By : Bernard J Costa

ಕುಂದಾಪುರ್, ಜು. 16: ಕುಂದಾಪುರ್ ಕಾರ್ಮೆಲಿತ್ ಮೆಳಾಚ್ಯಾ ಧರ್ಮ್ ಭಯ್ಣ್ಯಾನಿಂ, ಕಾರ್ಮಿಣ್ ಮಾಯೆಚೆ ಫೆಸ್ತಾ ದಿಸಾ ಸಾಂ.ಜುಜೆ ಕೊವೆತಾಂತ್ ಫೆಸ್ತ್ ಆಚರ್ಸಿಲೆಂ.

ಕುಂದಾಪುರ್ಚೊ ಸಹಾಯಕ್ ವಿಗಾರ್ ಬಾಪ್ ಮಾ|ಸಂದೀಪ್ ಜೆರಾಲ್ಡ್ ಡಿಮೆಲ್ಲೊ ಹಾಣಿ ಪ್ರಧಾನ್ ಯಾಜಕ್ ಜಾವ್ನ್ ಪವಿತ್ರ್ ಬಲಿದಾನ್ ಭೆಟಯ್ಲೆ0. “ಕಶ್ಟಾಂ ಸಂಕಶ್ಟಾ ವೇಳಾರ್ ಕಾರ್ಮಿಣ್ ಮಾಯೆಲಾಗಿಂ ಸಸಾಯ್ ಮಾಗ್ಯಾ, ತಿಂ ಆಮ್ಕಾಂ ರಾಕೊನ್ ವ್ಹರ್ತಾ, ಮ್ಹಣ್ತಾಂ ತಾಣಿ ಕಾರ್ಮೆಲ್ ಮಾಯೆಚಿ ಚರಿತ್ರಾ ಕಳಯ್ಲಿ, ಜೆಜುನ್ ಅಶ್ಚರ್ಯೆಂ ಕರುಂಕ್ ಮರಿಮಾಯ್ ಕಾರಣ್ ಜಾಲಿ, ಶಿಸಾಂಕ್ ತಿ ಪ್ರೇರಣ್ ಜಾಲಿ ಮರಿಮಾಯ್ ಕುಮ್ಕೆಚಿ ದಾತರ್ನ್ ಜಾವ್ನಾಸಾ’ ಮ್ಹಣನ್ ತಾಣಿ ಸಂದೇಶ್ ದಿಲೊ.

ಪ್ರಿನ್ಸಿಪಾಲ್ ಬಾಪ್ ಪ್ರವೀಣ್ ಅಮ್ರತ್ ಮಾರ್ಟಿಸ್ ಆನಿ ಕುಂದಾಪುರ್ಚೊ ವಿಗಾರ್ ಮಾ| ಬಾಪ್ ಅನೀಲ್ ಡಿಸೋಜ್ ಹಾಣಿ ಸಹಭೆಟವ್ಣಿ ಕೆಲಿ ವಿಗಾರ್ ಬಾಪಾನ್ , ಕಾರ್ಮೆಲ್ ಧರ್ಮ್ ಭಯ್ಣಿಂಕ್, ಕಾರ್ಮೆಲ್ ಭಾವಾಂಕ್ ಫೆಸ್ತಾಚೆ ಶುಭಾಶಯ್ ಪಾಠಯ್ಲೆಂ.

ವ್ಹಡಾ ಸಂಖ್ಯಾನ್ ಹಾಜರ್ ಆಸಲ್ಲ್ಯಾ ಭಕ್ತಿಕಾಂಕ್ ಕಾರ್ಮೆಲ್ ಧರ್ಮ್ ಭಯ್ಣ್ಯಾನಿಂ ಬೆತಿಣ್ಯೊ ವಾಂಟಲ್ಯೊ. ಕೊವೆಂತಾಚಿ ವ್ಹಡಿಲ್ನ್ ಭಯ್ಣ್ ವಿಭಾ ಆನಿ ಅನೇಕ್ ಧರ್ಮ್ ಭಯ್ಣ್ಯೊ ಹಾಜರ್ ಆಸಲ್ಯೊ.