ಕುಟ್ಮಾಚೆಂ ಬೆಳ್ಯಾಚೆಂ ಆನಿ ಭಲಾಯ್ಕೆಚೆಂ ಮೊಂತಿ ಫೆಸ್ತ್

Published On : 07 Sep 2016

(Special Article By Bernard J Costa)

‘ತುಜ್ಯಾ ಜಲ್ಮಾನ್ ದೆವಾಚೆ ಭಾಗೆವಂತಿ ಆಂಕ್ವಾರ್ ಮರಿಯೆ ಸಂಸಾರ್ ಸಂತೊಸ್ ಭರ್ಲಾಂ, ಕಿತ್ಯಾಕ್ ತುಜೆಂ ಥಾವ್ನ್ ಉದೆಲಾ ನಿತಿಚೊ ಸೂರ್ಯೊ ಕ್ರಿಸ್ತ್ ಸೊಮಿ’ ಧರ್ಮ್‍ಸಭೆಚ್ಯಾ ಅಂತಿಪೆÇೀನಾನಿಂ ನಾಂವಡಲ್ಯಾ ಮರಿಯೆ ಮಾಯೆಚಾ ಜಲ್ಮಾ ದಿಸಾಚೆ ಫೆಸ್ತ್ ಪವಿತ್ರ್ ಸಭಾ ಸೆಪ್ಟಂಬರಾಚಾ 8 ತಾರೀಕೆರ್ ಸಂಭ್ರಮಾನ್ ಆಚರ್ಸಿತಾ.

ಪ್ರಥ್ವೆರ್, ಖಾಸ್ ಕರ್ನ್ ಭಾರತಾಂತ್ ಸುಮಾರ್ ತೀನ್ ಮ್ಹಹಿನೆಂ ಭರ್ ನಿರಂತರ್ ಪಾವ್ಸ್ ಪಡ್ತಾಂ, ಭಿಂ ವೊಂಪುನ್ ಬೆಳೆ ಪಿಕೊಂಕ್ ಆನಿ ರೂಕಾಂ ಝಡಾಂಕ್ ಫಲ್ ಫುಲ್ ಜಾಂವ್ಕ್ ಪ್ರಥ್ವೆಚೊ ಧನಿ ಗರ್ಜ್ ಆಸ್ಚೆಂ ಉದಾಕ್ ಹ್ಯಾ ಪಾವ್ಸಾ ದ್ವಾರಿಂ ದಾಡ್ತಾಂ. ರೂಕ್ ಝಡಾಂ ವಾಡೊನ್ ಪಾಚ್ವ್ಯಾ ರಂಗಾನ್ ಸೊಭ್ತಾತ್ ತರ್, ಫುಲಾಂ ಝಡಾನಿಂ ವಿವಿಧ್ ರೀತಿಚಿಂ ವಿವಿಧ್ ರಂಗಾಚಿ ಫುಲಾಂ ಫುಲೊನ್ ಸೊಭ್ತಾತ್. ಅಶೆಂ ಪೃಕ್ರತಿಚ್ ಆಮ್ಚ್ಯಾ ಕ್ರಿಸ್ತ್ ಮಾಯೆಚಾ ಜಲ್ಮಾ ದಿಸಾಚಾ ಯೆಣ್ಯಾಕ್ ಆಯ್ತಿ ಜಾತಾಂ.

ಮರಿಯೆಚಾ ಜಲ್ಮಾಚಾ ಫೆಸ್ತಾಚೆಂ ಆಚರಣ್ ಆರಂಭ್
ಕ್ರಿ.ಶ. 55 ಇಸ್ವೆಂತ್ ಬೈಜಾಂಟಿಯಮ್ ಹಾಂಗಾಸರ್ ಸುರ್ವೆರ್ ಫೆಸ್ತ್ ಆಚರ್ಸಿಲೆಂ ದಾಖ್ಲೆಂ ಮೆಳ್ತಾತ್. ಪವಿತ್ರ್ ಸಭಾ ಸುರ್ವಿಲ್ಯಾ ಕಾಳಾರಚ್ ಮರಿಯೆಕ್ ಗಾಯಾನ್ ಕೀರ್ತನಾನಿಂ ಸ್ಥುತಿ ಗಾಯ್ತಾ. ಕ್ರಿ.ಶ. 457 ಇಸ್ವೆಂತ್ ನೇಪಾಳಾಂತ್ ಆಸಲ್ಲ್ಯಾ ಕೊನ್ಸೆಸ್ಕಾಂಚ್ಯಾ ಸಾಂ. ಪೆÇ್ರಯೆಲುಸ್ ಮ್ಹಳ್ಯಾಚಾ ಬರ್ಪಾನಿಂ ಮರಿಯೆಚ್ಯಾ ಜಲ್ಮಾ ದಿಸಾಚೊ ಉಲ್ಲೇಖ್ ಆನಿ ವ್ಹಡ್ವಿಕೆಚೊ ವಿವರ್ ಮೆಳ್ತಾ.

ರೋಮಾಂತ್ ಸುಮಾರ್ ಕ್ರಿ.ಶ. 675 – 700 ಇಸ್ವೆಂತ್ ಮರಿಯೆಚಾ ಜಲ್ಮಾ ದಿಸಾಚೆಂ ಫೆಸ್ತಾಚೆ ಆಚರಣ್ ಆರಂಭ್ ಜಾಲೆಂ ಮ್ಹಳೆಂ ಅರ್ಗೊಸಾಚಾ ಸಾಂ. ಪೆದ್ರುಚ್ಯಾ ಬರ್ಪಾನ್ ದಿಸೊನ್ ಯೆತಾಂ.

‘ಲಿಬೆರ್ ಪೆÇಂತಿ ಫಿಕಾಲಿಸ್’ (ಪಾಪಾಚೆ ಪುಸ್ತಕ್) ಹಾಂತುನ್ ಪಾಪ್ ಸಾಯ್ಬ್ ಸೆರ್ಜಿಯನ್ (ಕ್ರಿ.ಶ. 687-701) ರೊಮಾಂತ್ಲ್ಯಾ ಸಾಂ. ಮರಿ ಮಾಯೊರ್ ಬಾಜಿಲಿಕಾಂತ್ ಮರಿಯೆಚ್ಯಾ ಜಲ್ಮಾ ದಿಸಾ ಹರ್ಯೆಕ್ ವರ್ಸಾಂ ಭವಾಡ್ತ್ಯಾನಿಂ ಪುರ್ಶವಾಂರ್ ವಚಾಜಾಯ್ ಮ್ಹಣನ್ ಆದೇಶ್ ದಿತಾಂ. 7 ವ್ಯಾ ಶತಮಾನಂತ್ ಸ್ಪೆಯ್ನಾಂತ್‍ಯಿ ಹೆಂ ಫೆಸ್ತ್ ಆಚರ್ಸಿತೆಲೆಂ ಮ್ಹಣನ್ ಕಳೊನ್ ಯೆತಾಂ. ಇಗ್ಲೆಂಡಾಂತ್ 8 ವ್ಯಾ ಶತಮಾನಾಂತ್ ಹೆಂ ಫೆಸ್ತ್ ಆಚರಣ್ ಕೆಲ್ಲೆಂ ಮ್ಹಣನ್ ವೆನೆರೆಬಲ್ ಬೀಡ್ ಕಳಯ್ತಾ. 9 ವ್ಯಾ ಶತಮಾನಾಂತ್ಲ್ಯಾ ಸಾಂತ್ ಥರಾಸಿಯಚಾ ಬರ್ಪಾನ್ ತ್ಯಾ ಕಾಳಾರ್‍ಯಿ ಮರಿಯೆ ಮಾಯೆಚ್ಯಾ ಫೆಸ್ತ್ ಆಚರಣ್ ಕೆಲ್ಲೆಂ ದಾಖ್ಲೆ ಸಾಂಗ್ತಾತ್. ತ್ಯಾ ಕಾಳಾರ್ ಮರಿಯೆಚೊ ಜಲ್ಮಾ ದೀಸ್ ಸೊಂತ್ ಜಾಂವ್ನ್ ಪಾಳ್ತಾಲೆ.

13 ವ್ಯಾ ಶತಮಾನಾಂತ್ ಆಖ್ಯೆ ಪವಿತ್ರ್ ಸಭಾ ಉದೆಂತಿ ಆನಿ ಅಸ್ತಮ್ತಿ ಗಾಂವಾಂನಿ ಹ್ಯಾ ದೀಸಾಕ್ ಮಾನ್ಯತಾ ದೀವ್ನ್ ಮರಿಯೆ ಮಾಯೆಚ್ಯಾ ಜಲ್ಮಾ ದೀಸಾಚ್ಯಾ ಆಚರಣಾಚೊ ಸಂಭ್ರಮ್ ಚಡಯ್ತಾ.

ಭಾರತಾಂತ್ ಮರಿಯೆಚಾ ಜಲ್ಮಾ ದಿಸಾಚೆ ಆಚರಣ್
ಭಾರತಾಂತ್ ಪೆÇೀರ್ಚುಗೀಸಾನಿಂ ‘ಮೌಂಟಿ’ ಮ್ಹಳ್ಯಾರ್ ಗುಡ್ಯಾ ವ್ಹಯ್ಲಿ ಸಾಯ್ಬಿಣ್ ಮ್ಹಳ್ಯಾ ನಾಂವಾ ಖಾಲ್ ಭಕ್ತಿಪಣ್ ಆರಂಭ್ ಕೆಲೆಂ. ಕ್ರಮೇಣ್ ಕರಾವಳಿ ಪ್ರಾಂತಾಂತ್ ಖಾಸ್ ಕರ್ನ್ ಕರ್ನಾಟಕ ಆನಿ ಕೇರಳ ಕೊಂಕ್ಣಿ ಕ್ರಿಸ್ತಾಂವ್ ಮಧೆಂ ಮೌಂಟಿ ತೆಂ ಮೊಂತಿ ಜಾಂವ್ನ್ ಮೊತಿ ಸಾಯ್ಬಿಣಿ ಮ್ಹಳ್ಯಾ ನಾಂವಾನ್ ಫೆಸ್ತ್ ಆಚರಣ್ ಕರ್ತಾಂ ಕರ್ತಾಂ ವಿಶೇಸ್ ರೂಪ್ ಘೆಂವ್ನ್ ವಾಡೊನ್ ಆಯ್ಲೆಂ.

ಆಮ್ಚ್ಯಾ ರಾಜ್ಯಾಚಾ ಕರಾವಳಿಂತ್ ಖಾಸ್ ಕರ್ನ್ ಮಂಗ್ಳೂರ್ ಉಡುಪಿ ಆನಿ ಕೇರಳಾಚ್ಯಾ ಕಾಸರ್‍ಗೋಡ್ ಜಿಲ್ಲ್ಯಾನಿಂ, ಮರಿಯೆಚ್ಯಾ ಜಲ್ಮಾಚಾ ಕಾಳಾರ್ ಹಿಂದ್ವಾಕ್‍ಯಿ ಫೆಸ್ತಾಚೊ ಕಾಳ್ ಆರಂಭ್ ಜಾತಾಂ, ನಾಗರ ಪಂಚಮಿ, ಚೌತಿ, ಆನಿ ನವೆ ಬೆಳ್ಯಾಚೆ ಫೆಸ್ತ್ ಆಚರಣ್ ಕರ್ತಾತ್. ಮುಖ್ಯ್ ಬೆಳೆ ಜಾವ್ನಾಸ್ಲೆಂ ಭಾತಾಚೆಂ ಪೂಜಾ ಕರ್ನ್ ತ್ಯಾ ತ್ಯಾ ಉಪಜಾತಿಚ್ಯಾನಿಂ ನೇಮಿಯಾರ್ಲ್ಯಾ ದಿಸಾ ನವೆಂ (ಹೊಸತು) ಜೆವ್ತಾತ್.

ಕುಟ್ಮಾಚೆಂ ಫೆಸ್ತ್

ಅಮಿ ಕ್ರಿಸ್ತಾಂವ್ ತರಿ, ಹಾಂಗಾಚ್ಯಾ ಮಾತ್ಯೆಂತ್ ಜಲ್ಮಾಲ್ಲೆಂ ಆಮ್ಕಾಂಯಿ ತಾಂಚ್ಯಾ ಸಂಸ್ಕ್ರತೆ ಪ್ರಕಾರ್ ಆಮಿಯಿ ಅಸಲೆಂ ನವೆ ಆಚರಣ್ ಕರ್ಚ್ಯಾಕ್ ಉರ್ಬಾ ದಾಖಯ್ತಾ, ಆನಿ ಹ್ಯಾಚ್ ವೇಳಾ ಮೊಂತಿ ಮಾಯೆಚೆ ಫೆಸ್ತ್ ಆಯ್ತೆಂ ಜಾವ್ನ್ ಯೆಂವ್ಚೆ ಕ್ರಿಸ್ತಾವಾಂಕ್ ಮಹಾ ವ್ಹಡ್ಲೆಂ ಭಾಗ್ ಜಾಂವ್ಕ್ ಪಾವ್ತಾ. ಮರಿಯೆಚೆ ಜಲ್ಮಾ ದೀಸ್ ಆಚರ್ಸುಂಚ್ಯಾ ಸಂಗಾತಾ. ನವೆಂ ಬೆಳೆ ದಿಲ್ಯಾ ದೆವಾಕ್ ಆರ್ಗಾಂ ಪಾಟಂವ್ಕ್ ಹೊ ಭಾಗಿ ಅವ್ಕಾಸ್ ಆಮ್ಚೆಂ ಮಲ್ಘಡೆಂ ಯೋಗ್ಯ್ ಥರಾನ್ ಉಪಯೋಗ್ಸುನ್ ಘೆತಾಂ. ಹೆಂ ಆಮ್ಚೆ ಏಕ್ ಭಾಗ್ ಮ್ಹಣ್ಯೆತ್. ದೆಕುನ್ ಮಲ್ಘಡ್ಯಾಂಚೊ ಉಪ್ಕಾರ್ ಆಮಿ ಮಾಂದಿಜೆ ಪಡ್ತಾಂ.

ಹೆಂ ಫೆಸ್ತ್ ಆಮಿ ಭಾರತೀಯ ಸಂಸ್ಕ್ರತೆ ಪ್ರಕಾರ್ ಕರ್ಚೆಂ ವಿಶಿಸ್ಟ್ ಫೆಸ್ತ್. ಹಾಕಾ ಸಾಕ್ಸ್ ಆಮಿ ಚಡ್ತಿಕ್ ಜಣಾನಿಂ ತ್ಯಾ ದೀಸಾ ಚಡ್ ಜಾವ್ನ್ ರಾಂದ್ವಾಯೆಚೆಂ ಜೆವಾಣ್ ಜೆಂವ್ಚೆ, ಶುದ್ದ್ ಭಾರತೀಯ ಸಂಸ್ಕ್ರತೆ ಪರ್ಮಾಣೆ ಖೆಳಿ ಕೊಲ್ಯಾರ್, ನಮೂನ್ಯಾ ವಾರ್ ರಾಂದ್ವಯ್ ರಾಂದ್ಚೆ, ತಶೆಂ ತ್ಯಾ ದಿಸಾ ಆಶಿರ್ವಾದಿತ್ ಕೆಲ್ಲೆಂ ನವೆ ಬೆಳೆ ಬಾತಾಚಿ ಕಣ್ಸಾ ಘರಾ ಹಾಡ್ನ್ ತೆಂ ಕಣ್ ವೊರ್ನಾಂತ್, ರೊಸಾಂತ್, ಪೆÇವಾಂತ್ ಅಶೆಂ ಥರಾವಳ್ ನಮೂನ್ಯಾರ್ ಖಾಣಾಂತ್ ಭರ್ಸುನ್ ಸಗ್ಳೆಂ ಕುಟಾಮ್ ಸಂಗಾತಾ ಮೆಳೊನ್ ನವೆಂ ಜೆಂವ್ನ್ ಫೆಸ್ತ್ ಸಂಭ್ರಮ್ಚೆ ಕೆನರಾ ಕ್ರಿಸ್ತಾವಾಂತ್ ರೂತಾ ಜಾವ್ನ್ ಗೆಲ್ಯಾ (ಹಿಂದ್ವಾಯಿ ತಾಂಚ್ಯಾ ನವ್ಯಾ ದಿಸಾ ಆವಯ್ ಬಾಪಯ್ ಭಾವ್ ಭಯ್ಣ್ ಕುಟ್ಮಾಚೆಂ ಸರ್ವ್ ಸಾಂದೆ ಮೆಳೊನ್ ನವೆ ಜೆವ್ತಾತ್) ರಿವಾಜಿಕ್ ಆಯ್ಲೆಂ. ಕೇರಳಾಂತ್ ಹ್ಯಾಚ್ ವೇಳಾ ‘ಒಣಂ’ ಫೆಸ್ತ್ ಯೆತಾಂ. ಹ್ಯಾ ಫೆಸ್ತಾಕ್ ಆಮಿ ನವೆಚ್ಯಾ ಫೆಸ್ತಾ ತಶೆಂ ಥರಾವಳ್ ರಾಂದ್ವಯ್, ಗೋಡ್ಸಿಂ ಖಾಣಾ ಜೆವ್ಣಾಚೆಂ, ರಾಂದ್ವಯೆಚೆ ಜೆವಾಣ್ ಕುಟ್ಮಾ ಸಂಗಾತಾ, ಕೆಳಿ ಖೊಲ್ಯಾರ್ ಜೆಂವ್ಚೆ ವಿಶಿಸ್ಟ್ ಫೆಸ್ತ್ ಆಚರ್ಸಿತಾಂ.

ಹ್ಯಾಚ್ ಚಡ್ ಉಣೆಂ ಹ್ಯಾಚ್ ಕಾಳಾ ಹಿಂದ್ವಾ ಸೊಣ್ಯಾರ್ತಿ (ಫೆಸ್ತಾಕ್) ಮ್ಹಣ್ಚ್ಯಾ ಮಹಿನ್ಯಾಂತ್ ತಾಂಚ್ಯಾ ದೆವಾಕ್ ಸದಾಂ ನೀತ್ ಫುಲಾಂ ಅರ್ಪುನ್ ಪೂಜಾ ಕರ್ತಾಂ, ಕ್ರಿಸ್ತಾಂವಾನಿಂ ಮರಿಯೆ ಮಾಯೆಚ್ಯಾ ಫೆಸ್ತಾಕ್ ತಯಾರಾಯ್ ಜಾಂವ್ನ್ ನೊವೆನಾ ವೇಳಾರ್ ಫುಲಾಂ ಹಾಡ್ನ್ ಬಾಳೊಕ್ ಮರಿಯೆ ಮಾಯೆಕ್ ಅರ್ಪುಂಚಿ ರಿವಾಜ್ ಅಪ್ಣಾಂವ್ನ್ ಘೆತ್ಲಿಂ.

ಉಪ್ರಾಂತ್ ಹಿ ಆಮ್ಚಿಚ್ ಸಂಸ್ಕ್ರತಿ ತಶೆಂ ರೂಪಿತ್ ಜಾಲಿ. ಆನಿ ತಿ ಸಂಸ್ಕ್ರತಿ ಮುಕಾರ್ ವಾಡಾಚ್ ವಚೊನ್ ಭೋವ್ ಸುಂದರ್ ಆನಿ ಭೋವ್ ಅರ್ಥಾ ಭರಿತ್ ಮರಿಯೆ ಮಾಯೆಚೆ ಫೆಸ್ತಾಅಚ್ಯಾ ಆಚರಣಾಕ್ ಕಾರಣ್ ಜಾಲೆಂ. ಅಸಲೆಂ ಏಕ್ ಸೊಭಿತ್ ಸಂಸ್ಕ್ರತೆನ್ ಭರ್ಲೆಲೆಂ ಹೆಂ ಮೊಂತಿ ಫೆಸ್ತ್ ಕರಾವಳ್ ಕೊಂಕ್ಣಿ ಕ್ರಿಸ್ತಾಂನಿ ಆಚರಣ್ ಕರ್ನ್ ಆಜ್ ಸಂಸಾರ್ ಭರ್ ಕರಾವಳಿಚ್ಯಾ ಹ್ಯಾ ಫೆಸ್ತಾಕ್, ವೀಶೆಸ್ ಮಹತ್ವ್ ಅಪ್ಣಾಂವ್ನ್ ಘೆತ್ಲಾಂ ಆನಿ ಮರಿಯೆಚೊ ಜಲ್ಮಾ ದೀಸ್ ಅಶೆಂ, ಏಕ್ ವಿಶಿಸ್ಠ್ ರೀತಿರ್ ಆಚರಣ್ ಕರ್ಯೆತ್ ಮ್ಹಣನ್ ಸಂಸಾರಾಕ್ ಆಮ್ಚ್ಯಾ ಮಲ್ಘಡ್ಯಾನಿಂ ದಾಖವ್ನ್ ದಿಲ್ಯಾ.

ಪಯ್ಲೆಂ ಹ್ಯಾ ಫೆಸ್ತಾಕ್ ವಾಜಾಪ್ (ಬ್ಯಾಂಡ್) ಮ್ಹಳೆಂ ವಾಜಾಂವ್ಕ್ ಇಗರ್ಜಾನಿಂ ಹಿಂದ್ವಾಚ್ ಯೆತೆಲಿ. ಮಾಗಿರ್ ತೆಂ ವಾಜಾಪ್ (ಬ್ಯಾಂಡ್) ಸಕ್ಕಡ್ ಕ್ರಿಸ್ತಾಂವಾಗೇರ್ ಯೆತೆಲೆಂ. ತ್ಯಾ ವಾಜ್ಪಾನ್ ತೆಂ ಬ್ಯಾಂಡ್ಕಾರ್ ಮರಿಯೆಚಿಂ ಕಾಂತಾರಾಂ ಗಾಯ್ತೆಲಿ. ಆತಾಂ ಹಿ ಸಂಸ್ಕ್ರತಿ ಮಾಯಾಕ್ ಜಾಲ್ಯಾ.

ಭಾರತಚ್ಯಾ ವ್ಹಡ್ ಶಹರಾನಿಂ ಹೆಂ ಫೆಸ್ತ್

ಭಾರತಚ್ಯಾ ವ್ಹಡ್ ಶಹರಾನಿಂ ಮರಿಯೆ ಮಾಯೆಚ್ಯಾ ಫೆಸ್ತಾ ದಿಸಾ ವಿಶೇಸ್ ಸಂಭ್ರಮ್ ಆಚರಣ್ ಜಾತಾಂ. ತಮಿಳ್ನಾಡುಚ್ಯಾ ವೆಲಂಕಣಿಂತ್ ವಿಶೇಸ್ ಸಮಾರಂಭ್ ಚಲ್ತಾಂ. ಹ್ಯಾ ದಿಸಾನಿಂ ಲೋಕ್ ಥಂಯ್ಸರ್ ಹಾರಿ ಹಾರಿನಿಂ ವೆತಾಂ.

ಮುಂಬಯ್ ವಿಲ್ಲೆಪಾರ್ಲೆ ಲಾಗ್ಸರ್ ಇರ್ಲಾಚಿ ಸಾಯ್ಬಿಣ್ ಮ್ಹಣನ್ ಥಂಯ್ಸರ್ ವಿಶೆಸ್ ನೊವೆನ್ ಚಲ್ತಾಂ, ಧಾವ್ಯಾ ದಿಸಾ ಗದ್ದಾಳಾಯೆನ್ ಫೆಸ್ತ್ ಚಲ್ತಾಂ. ಹ್ಯಾ ಧಾ ದಿಸಾನಿಂ ಲೇಖ್ ನಾತಲ್ಲ್ಯೊ ಸಾಡಿಯೊ ಹ್ಯಾ ಇಗರ್ಜೆಕ್ ಸಾಯ್ಬಿಣಿ ಖಾತಿರ್ ದಾನ್ ದಿತಾತ್, ತಾಂತ್ಲ್ಯೊ ಸಾಡಿಯೊ ವಿಂಚುನ್, ಧಾ ದಿಸ್‍ಯಿ ಸಾಯ್ಬಿಣಿಕ್ ನವೆಂ ಸಾಡಿಯೊ ನ್ಹೆಸಯ್ತಾತ್. ಮಾಹಿಮ್ ನಿತ್ಯಾಧರ್ ಮಾಯೆಚೆ ಅಶ್ಚರ್ಯಾಂ ಚಲ್ಚ್ಯಾ ಇಗರ್ಜೆಂತ್‍ಯಿ ವ್ಹಡ್ ಸಂಭ್ರಮ್ ಚಲ್ತಾಂ. ತಶೆಂಚ್ ಬೆಂಡ್ರಾ ಮೌಂಟ್ ಮೇರಿಂತ್ ಫೆಸ್ತಾಚ್ಯಾ ಪಯ್ಲೆಂ ನೋವ್ ದೀಸ್ ನೊವೆನ್ ಚಲ್ತಾಂ, ಆನಿ ತಾಚ್ಯಾ ಉಪ್ರಾಂತ್ ಧಾ ದೀಸ್ ಮ್ಹಣಾಸರ್ ವ್ಹಡ್ಲೊ ಜಾತ್ರೊ ಚಲ್ತಾಂ. ಹೊ ಜಾತ್ರೊ ವಿಶ್ವ್ ವಿಖ್ಯಾತ್ ಜಾವ್ನಾಸಾ.

ಸುಗ್ಗಿ ಹಬ್ಬ

ಕನ್ನಡ ಕ್ರಿಸ್ತಾಂವ್ ಹ್ಯಾ ಫೆಸ್ತಾಕ್ ಸುಗ್ಗಿ ಹಬ್ಬ ಮ್ಹಣ್ತಾತ್. ಕುಟ್ಮಾಚೆ ಸಾಂದೆ ಪಯ್ಸ್ ಆಸ್ಲ್ಯಾರ್ ಹ್ಯಾ ಫೆಸ್ತಾಚಾ ಆದ್ಲ್ಯಾ ದಿಸಾಚ್ ಸರ್ವ್ ಸಾಂದೆ ಘರಾ ಯೆಂವ್ನ್ ಪಾವ್ತಾತ್. ಆಸ್ ಪಾಸ್ ವಚೊನ್ ಫುಲಾಂ ಎಕ್ಟಾಯ್ ಕರ್ತಾತ್. ಫೆಸ್ತಾಚ್ಯಾ ಸಕಾಳಿ ನಾಂವ್ನ್, ನವಿ ಮುಸ್ತಾಯ್ಕಿ ನೆಸ್ತಾತ್. ಎಕ್ಟಾಯ್ ಕೆಲ್ಲಿಂ ಫುಲಾಂ ಇಗರ್ಜೆ ವ್ಹರ್ನ್ ಆಡಂಭರಾಚೊ ಪುರ್ಶ್ಯಾಂವ್ ಕಾಡ್ನ್, ಫುಲಾಂ ಆನಿ ನವೆಂ ಬೆಳೆ ಮರಿಯೆಕ್ ಅರ್ಪುನ್ ವಿೂಸಾಚೆ ಬಲಿದಾನ್ ಭೆಟಯ್ತಾತ್. ಘರಾ ನವ್ ರೀತಿಚೆಂ ನಿಸ್ತ್ಯಾಚೆಂ ಜೆವಾಣ್ ಕರ್ನ್ ಫೆಸ್ತಾಚೊ ಸಂಭ್ರಮ್ ಆಚರ್ಸಿತಾತ್

ಮರಿಯ್ಯ್ ಮಾಯೆಚ್ಯಾ ಜಲ್ಮಾ ಫೆಸ್ತಾಕ್ ತೇರ್

ಕ್ರಮೇಣ್ ಹ್ಯಾ ಫೆಸ್ತಾಚೊ ದಭಾಜೊ ಚಡೊನ್ ಹಿಂದ್ವಾ ಬರಿ ‘ತೇರ್’ ಕರ್ನ್ ತ್ಯಾ ತೇರಾಂತ್ ಮರಿಯೆ ಮಾಯೆಚಿ ಇಮಾಜ್ ಧವರ್ನ್ ತೊ ವ್ಹಡ್ನ್ ವ್ಹರ್ಚ್ಯಾ ಬರಾಭರ್ ಉತ್ಸವಾಚೆ ಆಚರಣ್ ಚಲ್ತೆಂ ಆಸಾ. ಅಸಲೊ ಎಕ್ ತೇರ್ ಕರ್ನಾಟಕಚಿ ಪಯ್ಲಿ ಬಾಸಿಲಿಕಾ ಶಿವಾಜಿ ನಗರ್ಚ್ಯಾ ಸೈಂಟ್ ಮೇರಿಸ್ ಇಗರ್ಜೆ ಹಾಂಗಾಸರ್ ಆಸಾ. ತೊ ತೇರ್ ಮರಿಯೆ ಮಾಯೆಚ್ಯಾ ಫೆಸ್ತಾ ಖಾತಿರಚ್ ಹೊ ಲ್ಹಾನ್ ವಿಶೇಸ್ ತೇರ್ ತಯಾರ್ ಕೆಲ್ಲೊ ಆಸೊನ್ ಹ್ಯಾ ಫೆಸ್ತಾ ದೀಸಾ ಮರಿಯೆ ಮಾಯೆಚಿ ಇಮಾಜ್ ಧವರ್ನ್ ತೇರ್ ದಾಂಡ್ತಾತ್.

ಭಲಾಯ್ಕೆಚೆಂ ಫೆಸ್ತ್

ಕರ್ನಾಟಾಕಾಚೆಂ ಆನ್ಯೆಕ್ ಪುಣ್ಯ್ ಕ್ಷೇತ್ರ್ ಭಲಾಯ್ಕಿ ಮಾಯ್ ‘ಹರಿಹರಾಂತ್’ ಹ್ಯಾ ಫೆಸ್ತಾ ವೇಳಾ ಸಭಾರ್ ದಿಸಾಂಚೊ ವಿಶೆಸ್ ಜಾತ್ರೊ ಚಲ್ತಾಂ. ಲೇಖ್ ನಾತಲ್ಲೊ ಭಕ್ತಿಕ್ ಯೆವ್ನ್ ಭಲಾಯ್ಕಿ ಬರಿ ಕೆಲ್ಯಾಕ್ ಆನಿ ಭಲಾಯ್ಕಿ ಬರಿ ಜಾಂವ್ಚ್ಯಾ ಪಾಸೊತ್ ಭೇಟ್ ದಿತಾಂ. ಹಾಂಗಾಸರ್‍ಯಿ ಮರಿಯೆ ಮಾಯೆಕ್ ತೇರಾಂತ್ ಧವರ್ನ್ ಪುರ್ಶಾಂವ್ ಕಾಡ್ಚೊ ಸಂಭ್ರಮ್ ಚಲ್ತಾಂ.

ಹ್ಯಾ ಫೆಸ್ತಾಕ್ ಏಕ್ ರೂಪ್ ಅರ್ಥ್ ದಿಂವ್ಯಾ

ಭಾರತೀಯ ಸಂಸ್ಕ್ರತೆ ಬರಿ ನವೆಂ ಫುಲ್, ಬೆಳೆ ದಿಲ್ಯಾ ಖಾತಿರ್ ದೆವಾಕ್ ಅರ್ಗಾಂ ದಿಂವ್ಚ್ಯಾ ಸವೆಂ ನವೆಂ ಬೆಳೆ ಆಮಿ ಸೆಂವ್ಚ್ಯಾ ಪಯ್ಲೆಂ ಆಶಿರ್ವಾದ್ ಮಾಗೊನ್ ಘೆಂವ್ಚೆ ಹೆಂ ಫೆಸ್ತ್ ಕರ್ನಾಟಾಕಾಂತ್ ತರಿ ರೀತ್ ರಿವಾಜಿಂ ಏಕ್ ರೂಪಾರ್ ಜಾರ್ಯೆಕ್ ಹಾಡುನ್ ಹ್ಯಾ ಫೆಸ್ತಾಕ್ ಏಕ್ ಬೊರೊ ಅರ್ಥ್ ಯೆ ತಶೆಂ ಕರ್ಚಿಂ ಗರ್ಜ್.

ಕಿತೆಂಯಿ ಜಾಂವ್ ಮರಿಯೆಚಾ ಜಲ್ಮಾ ದಿಸಾ ಆಮ್ಚ್ಯಾ ಕರಾವಳಿ ಕೊಂಕ್ಣಿ ದಿಯೆಸಿಜಿಚೊ ಲೋಕ್ ಖಂಯ್ ಆಸ್ಲ್ಯಾರಿ, ಸೆಪ್ಟಂಬರಾಚಿ ಆಟ್ ತಾರೀಕ್ ವಿಸ್ರನಾ. ಮರಿಯೆಚೆ ನೊವೆನ್, ಫುಲಾಂ ಉಡಯ್ಲೊ ಉಡಾಸ್, ಫೆಸ್ತ್ ವಿೂಸ್, ಕೆಳ್ಯಾ ಖೊಲ್ಯಾ ವಯ್ಲೆಂ, ಥರಾವಳ್ ರಾಂದ್ವಯೆಚೆ ಜೆವಾಣ್ ಉಡಾಸ್ ಕಾಡಿನಾಸ್ತಾಂ ರಾಂವ್ಚೊ ನಾ. ಹಾಕಾ ಸಾಕ್ಸ್ ಮ್ಹಳ್ಯಾರ್ ಆತಾಂ ಸಭಾರ್ ವಿದೇಶಾನಿಂ ಆಮ್ಚೆಂ ಮಂಗ್ಳೂರ್‍ಗಾರ್ ಭಾವ್ ಗಾಂವಾ ಥಾವ್ನ್ ಬಾತಾಚಿಂ ಕಣ್ಸಾ ಹಾಡಂವ್ನ್ ಬೆಂಜಾರ್ ಕರವ್ನ್ ಲೋಕಾಂಕ್ ದಿಂವ್ನ್ ಥಂಯ್ಸರ್‍ಯಿ ನವೆಂ ಆಚರಣ್ ಕರ್ಚೆಂ ಸಭಾರ್ ವರ್ಸಾಂ ಥಾವ್ನ್ ಚಲೊನ್ ಆಯ್ಲ್ಯಾ.

ಅಶೆಂ ಸಂಸಾರ್ ಭರ್, ದೇಶ್ ಭರ್, ಮರಿಯೆ ಮಾಯೆಚೆ ಫೆಸ್ತ್ ಭಕ್ತಿನ್ ಆನಿ ದಭಾಜೆ ಆಚರ್ಸಿತಾನಾ, ಮರಿ ಮಾಯ್ ಆಪ್ಲ್ಯಾ ಭುರ್ಗ್ಯಾಂಚೇರ್ ಆಪ್ಲಿಂ ಆಶಿರ್ವಾದಾಂ ವೊತುನಂಚ್ ಆಸಾ.

ಸರ್ವಾಂಕ್ ಏಕ್ ಮೊಗಾಚೆ ಸಂತೊಸಾಚೆಂ ಮೊಂತಿ ಫೆಸ್ತ್.