ಕೊಂಕಣಿ ಸಾಹಿತ್ಯ್ ಆಕಾಡೆಮಿ – ಜೈ ಕೊಂಕಣಿ ಥಾವ್ನ್ ಕುಂದಾಪುರಾಂತ್ ಕೊಂಕಣಿ ಉಲವ್ಪಿ ಶಿಕ್ಷಕ್ ದಿನಾಚರಣ್

Published On : 12 Sep 2016 | Reported By : Bernard J Costa

ಕುಂದಾಪುರ್, ಸೆ.12: ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಆನಿ ಜೈ ಕೊಂಕಣಿ (ರಿ) ಕುಂದಾಪುರ್ ಹಾಂಚ್ಯಾ ಆಶ್ರಯಖಾಲ್ ಪಾರಿಜಾತಾ ಪದ್ಮಾವತಿ ಕಲ್ಯಾಣ ಮಂಟಪ್ ಸಭಾಸಾಲಾಂತ್ ಏಕ್ ದಿಸಾಚೆಂ ಕೊಂಕಣಿ ಉಲವ್ಪಿ ಶಿಕ್ಷಕಾಂಚೆ ದಿನಾಚರಣ್ ಚಲ್ಲೆಂ.

“ಶಿಕ್ಷಕ್ ವ್ರತ್ತಿ ಎಕ್ ಅಮೊಲಿಕ್, ಶಿಕ್ಷಕಾನಿಂ ಆಪ್ಲ್ಯಾ ವ್ರತ್ತೆ ಥಾವ್ನ್ ಸಮಾಜ್ ಅಭಿವ್ರದ್ದಿ ತಶೆಂ ಸಮಾಜ್ ಪರಿವರ್ತನ್ ಕರ್ಚಿಂ ಸೇವಾ ಕರಿಜೆ. ಭುರ್ಗ್ಯಾಂಕ್ ಉತ್ತಿಮ್ ಸಂಸ್ಕಾರ್ ದಿಂವ್ಚ್ಯಾ ಥಂಯ್ ಶಿಕ್ಷಕಾಂನಿ ಫುಡೆಂ ಸರಾಜಾಯ್, ಶಿಕ್ಷಣಾ ಸವೆಂ ಭಾಸ್ ಆನಿ ಸಂಸ್ಕ್ರತಿ ವಾಡವ್ನ್ ವ್ಹರ್ನ್ ಕೊಂಕ್ಣಿ ಶಿಕ್ಷಕಾನಾನಿಂ ಆದರ್ಶ್ ಶಿಕ್ಷಕಾಂ ಜಾಯ್ಜೆ’ ಮ್ಹಣನ್ ಹೆಂ ಕಾರ್ಯೆ ಉದ್ಘಾಟನ್ ಕೆಲ್ಯಾ ಮಣಿಪಾಲ್ ಅಕಾಡೆಮಿ ಆಪ್ ಜನರಲ್ ಎಜುಕೇಶನ್ ಆಡಳಿತ್ ಅಧಿಕಾರಿ ಎಚ್ ಶಾಂತಾರಾಮಾನ್ ಶಿಕ್ಷಕಾಂಕ್ ಸಂದೇಶ್ ದಿಲೊ.

ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ರಿಜಿಸ್ಟ್ರಾರ್ ಡಾ|ಬಿ.ದೇವದಾಸ್ ಪೈ ಹಾಣಿ ‘ಕೊಂಕಣಿ ರಾಶ್ಠ್ರ್ ಭಾಸ್ ಜಾವ್ನಾಸೊನ್, ಆಜ್ ಶಾಲೆಂತ್ ಕೊಂಕ್ಣಿ ಶಿಕಂವ್ಚಿ ಅನುಕೂಲತ ಆಯ್ಲಾ. ಹ್ಯಾ ದಿಶೆಂತ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿನ್ ಮಸ್ತ್ ವಾಂವ್ಟ್ ಕಾಡ್ಲ್ಯಾ, ಆತಾಂ ಮಂಗ್ಳುರ್ ವಿಶ್ವವಿದ್ಯಾನಿಲಯಾ ಥಾವ್ನ್ ಸ್ನಾತಕೋರ್ ಪದ್ವಿ ಸಮೇತ್ ಘೆಂವ್ಕ್ ಜಾತಾಂ’ ಮ್ಹಣನ್ ಅಕಾಡೆಮಿನ್ ಕರ್ಚ್ಯಾ ವಾವ್ರಾ ವಿಶಿಂ ವಿವರ್ ದಿಲೊ.

‘ಸಮಾಜೆಂತ್ ಶಿಕ್ಷಕ್ ಮಾತ್ರ್ ಗುರು ನ್ಹಯ್, ಸಮಾಜೆಂತ್ ಆಮ್ಕಾಂ ಆದರ್ಶ್ ವ್ಯೆಕ್ತಿ ಜಾಂವ್ನ್, ಜಿಯೆಂವ್ಕ್ ಪ್ರೇರಣ್ ದಿತಾತ್ ತಿಂ ಆವ್ಸ್, ಬಾಪುಯ್, ಮಲ್ಗಡೆಂ ಆನಿ ಕೋಣಯಿ ಜಾಂವ್ ತೊ ಆಮ್ಕಾಂ ಗುರು ಜಾತಾಂ. ವಿದ್ಯಾರ್ಥಿಂಕ್ ಆಮಿ ಸಮ್ಜೊಂವ್ನ್ ಘೆಜೆ, ಆವಯ್ಕ್ ಆನಿ ಭುರ್ಗ್ಯಾಂ ಬರಿ ಶಿಕ್ಷಕ್ ಆನಿ ವಿಧ್ಯಾರ್ಥಿ ಮಧೆಂ ಸಂಬಂಧ್ ಆಸಾಜೆ’ ಮ್ಹಣನ್ ಕಾರ್ಯಾಚೊ ಅಧ್ಯಕ್ಷ್ ಜಾವ್ನಾಸ್ಲ್ಯಾ ನಿವ್ರತ್ ಪ್ರಾಂಶುಪಾಲ್ ನಾಗೇಶ್ ಶ್ಯಾನುಭಾಗ್ ಹಾಣಿ ಸಂದೇಶ್ ದಿಲೊ.

ನಿವ್ರತ್ ಪ್ರಾಂಶುಪಾಲ್ ಆರ್.ಎನ್, ರೇವಣ್ಕರ್, ರಿಚರ್ಡ್ ಆಲ್ಮೇಡಾ ಕಾಲೇಜಿಚೊ ಸಂಚಾಲಕ್ ಸಿಲ್ವೆಸ್ಟರ್ ಆಲ್ಮೇಡಾ ಹಾಣಿ ಸಂದೇಶ್ ದಿಲೊ.

ಶಿಕ್ಷಕ್ ವಿಠಲ್ ಕಾಮಾತ್ ಆನಿ ಪಂಗ್ಡಾ ಥಾವ್ನ್ ಯಕ್ಷಗಾನ ಪ್ರಾತ್ಯಕ್ಷಿತ ಪ್ರದರ್ಶನ್ ಕೆಲೆಂ.ಶಿಕ್ಷಕ್ ಯೋಗಿಶ್ ಕಿಣಿ ಕಾರ್ಕಳ್ ಆನಿ ಪಂಗ್ಡಾ ಥಾವ್ನ್ ಕೊಂಕಣಿ (ಶಾಸ್ತ್ರಿಯ ಸಂಗಿತ ಶೈಲಿಂತ್) ಸಂಗೀತ್ ಕಾರ್ಯಕ್ರಮ ದಿಲೆಂ.

ಉಪನ್ಯಾಸಕಿ ಜಯಶೀಲಾ ಕೆ. ಕಾಮತ್, ಪ್ರತಿಭಾ ಪಿ. ಪೈ, ಸುಮಂಗಲ ಕಾಮತ್, ನಾರಾಯಣ್ ನಾಯ್ಕ್ ಆನಿ ಆಶಾ ಡಾಯಸ್ ಹಾಣಿ ಶಿಕ್ಷಣ್ ಆನಿ ಸಂಸ್ಕ್ರತಿ ವಿಷ್ಯಾಂತ್ ಚರ್ಚಾ ಗೋಷ್ಟಿಂತ್ ಭಾಗ್ ಘೆತ್ಲೊ.

ದನ್ಪಾರ ಉಪ್ರಾಂತ್ ಶಿಕ್ಷಂಕಾ ಥಾವ್ನ್ ಮನೋರಂಜನ್ ಜಾವ್ನ್ ನಾಟ್ಕುಳೆ, ಎಕಾಭಿನಯ್, ಗಾಯನ್, ಹಾಸ್ಯ್ ಚಟಾಕಿ ಕಾರ್ಯಕ್ರಮೆ ಚಲ್ಲೆಂ.

ಸಮಾಪನ್ ಸಮಾರಂಭಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ರೊಯ್ ಕಾಸ್ಟೆಲೀನೊ ಹಾಣಿ ಅಧ್ಯಕ್ಷ್ ಸ್ಥಾನ್ ಘೆಂವ್ನ್, ಪ್ರಸ್ತೂತ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿನ್ ಕೆಲ್ಲಿ ಕಾಮಾಚೊ ವಿವರ್ ದಿಲೊ. ‘ಕೊಂಕಣಿ ಉದ್ದಾರ್ ಜಾಯ್ಜೆ ತರ್ ಖಾಲಿ ಘರಾನಿಂ ಕೊಂಕ್ಣಿ ಉಲ್ಲಯ್ಲ್ಯಾರ್ ಪಾವಾನಾ, ಸಾಂಸ್ಕ್ರತಿಕ್ ಕಾರ್ಯಿಂ ಕೆಲ್ಯಾರ್ ಪಾವಾನಾ, ಜಾಯ್ತೆ ಸಾಹಿತ್ಯ್ ರಚಿತ್ ಕರಿಜೆ, ಇಸ್ಕೊಲಾನಿಂ ಕೊಂಕ್ಣಿ ಶಿಕಯ್ಜೆ ಮ್ಹಣನ್ ನಿರಂತರ್ ವಾವ್ರ್ ಕರಿಚ್ ಜಾಯ್ತೆ ಕೊಂಕಣಿ ಪುಸ್ಥಕ್ ಪ್ರಕಟ್ ಕರಿಚ್ ಆಸಾ. ಕೊಂಕಣಿ ಭಾಶೆಕ್ ಆಸ್ಲೆಂ ಸ್ಥಾನ್ ಮಾನ್ ವಿವರುನ್, ಆಮ್ಚಿ ಕೊಂಕ್ಣಿಯಿ ಏಕ್ ರಾಶ್ಠ್ರ್ ಭಾಸ್’ ಮ್ಹಣನ್ ಸಮ್ಜೊಣಿ ದಿಲಿ.

ಮುಖೇಲ್ ಸಯ್ರೊ ಸರಕಾರಿ ಶಿಕ್ಷಣ್ ವಿದ್ಯಾಲಯ್ ಮಂಗ್ಳುರ್ ಹಾಚೊ ಶಿಕ್ಷಕ್ ಮೋಹನ್ ದಾಸ್ ಪೈ ಹಾಣಿ ‘ಕೊಂಕಣಿ ಇಸ್ಕೊಲಾಂತ್ ಶಿಕಂವ್ಚ್ಯಾ ವಿಶಿಂ ಮಾಹೆತ್ ದಿಲಿ. ಪ್ರಾಂಶುಪಾಲ್ ರೂಪಾ ಶೆಣೈ, ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಸದಸ್ಯ್ ಲಾರೆನ್ಸ್ ಡಿಸೋಜಾ ಆನಿ ಹೇರ್ ವೇದಿರ್ ಹಾಜರ್ ಆಸ್ಲೆಂ.

ಕಾರ್ಯಾಚೊ ಸಂಚಾಲಕ್ ದಿನೇಶ್ ಪ್ರಭುನ್ ಸ್ವಾಗತ್ ಮಾಗ್ಲೊ. ಜೈ ಕೊಂಕಣಿ ಅಧ್ಯಕ್ಷ್ ಯು.ಎಸ್.ಶೆಣೈ ಪ್ರಸ್ತಾವನ್ ಭಾಷಣ್ ಕೆಲೆಂ. ಉಪನ್ಯಾಸಕಿ ಗೀತಾ ಪ್ರಭು, ಸಂಜಯ್ ಕಿಣಿ, ಗಿರೀಶ್ ಶ್ಯಾನುಭಾಗ್, ಭಾಸ್ಕರ ಪ್ರಭು ದೀಪಾ ಭಟ್ ಹಾಣಿ ಕಾರ್ಯೆ ನಿರೂಪಣ್ ಕೆಲೆಂ. ಪಿ ಜಯವಂತ್ ಪೈ ಹಾಣಿ ಧನ್ಯವಾದ್ ಪಾಟಯ್ಲೆಂ.