ಕ್ರಿಸ್ತಿ ಶಿಕ್ಷಣಂಚ್ ಭುರ್ಗ್ಯಾಂಚಾ ಪುಡ್ಲ್ಯಾ ಜಿಣಿಯೆಕ್ ಭದ್ರ್ ಬುನ್ಯಾದ್

Published On : 27 Feb 2017 | Reported By : Bernard J Costa

ಕುಂದಾಪುರಾಂತ್ ಕ್ರಿಸ್ತಾಂವ್ ಶಿಕ್ಷಣಾಚೊ ದಿವಸ್

ಕುಂದಾಪುರ್, ಫೆ.26: ‘ಆಮಿ ಅಮ್ಚಿ ಘರಾಂ ಭಾಂದ್ತಾನಾ ಘಟ್ ಮುಟ್ ಭದ್ರ್ ಬುನ್ಯಾದ್ ಗಾಲ್ತಾಂವ್, ತಶೆಂಚ್ ಆಮ್ಚ್ಯಾ ಭುರ್ಗ್ಯಾಂಚಾ ಪುಡ್ಲ್ಯಾ ಉತ್ತಿಮ್ ಮೌಲ್ಯಾಂ ಭರಿತ್ ಜಿಣಿಯೆ ಖಾತಿರ್ ಕ್ರಿಸ್ತಾಂವ್ ಶಿಕ್ಷಣ್ ಜಾವ್ನಾಸಾ ಭದ್ರ್ ಬುನ್ಯಾದ್. ತಶೆಂಚ್ ನಿಸ್ವಾರ್ಥ್ ಜಾವ್ನ್ ಕ್ರಿಸ್ತಾಂವ್ ಶಿಕ್ಷಣ್ ದಿಂವ್ಚ್ಯಾ ಶಿಕ್ಷಕಾಂಕ್ ಆಮಿ ಗೌರವ್ ದಿಂವ್ಕ್ ಜಾಯ್’ ಮ್ಹಣನ್ ಕುಂದಾಪುರ್ ಭಾಗೆವೊಂತ್ ರೊಜಾರ್ ಮಾಯೆಚ್ಯಾ ಫಿರ್ಗಜೆಚೊ ಶಿಕ್ಷಣ್ ದಿವಸ್ ಸೈಂಟ್ ಮೇರಿಸ್ ಪಿ.ಯು.ಕಾಲೇಜಿಚ್ಯಾ ಸಭಾಭವನಾಂತ್ ಆಚರ್ಸಿಲ್ಯಾ ವೇಳಾ ಫಿರ್ಗಜೆಚೊ ಪ್ರಧಾನ್ ಯಾಜಕ್ ವಿಗಾರ್ ಮಾ|ಬಾ| ಅನಿಲ್ ಸೋಜಾನ್ ಸಂದೇಶ್ ದಿಲೊ. ಹ್ಯಾ ಸಂದರ್ಭಾರ್ ತಾಣಿ ಕ್ರಿಸ್ತಾಂವ್ ಶಿಕ್ಷಣ್ ದಿಂವ್ಚ್ಯಾ ಶಿಕ್ಷಕಾಂಕ್ ಕಾಣಿಕ್ ದಿವ್ನ್ ಮಾನ್ ಕೆಲೊ.

ಕಾರ್ಯಾಚೊ ರೂವಾರಿ ಮಾ|ಬಾ|ಜೆರಾಲ್ಡ್ ಸಂದೀಪ್ ಡಿಮೆಲ್ಲೊ ಆನಿ ಪ್ರಾಂಶುಪಾಲ್ ಮಾ|ಬಾ|ಪ್ರವೀಣ್ ಅಮ್ರತ್ ಮಾರ್ಟಿಸ್ ಹಾಣಿ ಸುರ್ವೆರ್ ಕ್ರಿಸ್ತಿ ಶಿಕ್ಷಣ್ ಜೊಡ್ಚ್ಯಾ ಭುರ್ಗ್ಯಾಂ ಸವೆಂ, ತಾಂಚಿ ವ್ಹಡಿಲಾಂ ಸವೆಂ ಆನಿ ಕ್ರಿಸ್ತಿ ಶಿಕ್ಷಣ್ ದಿಂವ್ಚ್ಯಾ ಶಿಕ್ಷಕಾಂ ಸವೆಂ ಪವಿತ್ರ್ ಬಲಿದಾನ್ ಭೆಟಯ್ಲೆ.

ಸಭಾ ಕಾರ್ಯಕ್ರಮಾಂತ್ ಮಾ|ಬಾ|ಜೆರಾಲ್ಡ್ ಸಂದೀಪ್ ಡಿಮೆಲ್ಲೊ, ಪ್ರಾಂಶುಪಾಲ್ ಬಾಪ್ ಮಾ|ಪ್ರವೀಣ್ ಅಮ್ರತ್ ಮಾರ್ಟಿಸ್, ಗೊವ್ಳಿಕ್ ಮಂಡಳಿ ಉಪಾಧ್ಯಕ್ಷ್ ಜೇಕಬ್ ಡಿಸೋಜಾ, ಕಾರ್ಯದರ್ಶಿ ಫೆಲ್ಸಿಯಾನ್ ಡಿಸೋಜಾ, ಕುಂದಾಪುರ್ ಫಿರ್ಗಜ್ ಸರ್ವ್ ಅಯೋಗಾಂಚಿ ಸಂಚಾಲಕಿ ಪ್ರೇಮಾ ಡಿಕುನ್ಹಾ ಹಾಣಿ ಪಯ್ಲಿ ಕ್ಲಾಸ್ ಥಾವ್ನ್ ಪಿ.ಯು.ಸಿ. ಪರ್ಯಾಂತ್ಲ್ಯಾ ಭುರ್ಗ್ಯಾಂಕ್ ಕ್ರಿಸ್ತಾಂವ್ ಶಿಕ್ಷಣಾಂತ್ ಉತ್ತಿಮ್ ಅಂಕ್ ಘೆಂವ್ನ್ ಸಾಧನ್ ಕೆಲ್ಯಾಂಕ್ ಆನಿ ಚುಕಾನಾಸ್ತಾಂ ಶಿಕ್ಷಣ್ ಕ್ಲಾಸಿಂತ್ ಹಾಜರ್ ಜಾಲ್ಯಾಂಕ್ ಇನಾಮಾ ವಾಂಟ್ಲಿ.

ಹ್ಯಾ ಸಂದರ್ಭಾರ್ ಕುಂದಾಪುರ್ ಫಿರ್ಗಜ್ ಪತ್ರ್ ರೊಜಾರಿಯುಮ್ ಪತ್ರಾಚೆ ಕ್ವೀಜ್ ಸ್ಪರ್ದ್ಯಾಚೆ ಪ್ರಾಯೋಜಕ್ ಜಾವ್ನಾಚ್ಯಾ ಕೆನರಾ ಡಾಟ್ ಕಾಂ. ಹಾಚೊ ಪ್ರತಿನಿಧಿ ಪತ್ರ್‍ಕರ್ತ್ ಸಾಹಿತಿ ಬರ್ನಾಡ್ ಜೆ.ಕೋಸ್ತಾನ್ ಕ್ವೀಜ್ ವಿಜೆತಾಂಕ್ ಇನಾಮಾ ವಾಂಟ್ಲಿ. ವೇದಿರ್ ಕಿಸ್ತಾಂವ್ ಶಿಕ್ಷಣ್ ಶಿಕ್ಷಕಾಂಚಿ ಸಂಚಾಲಕಿ ಶಾಂತಿ ರಾಣಿ ಬಾರೆಟ್ಟೊ ಹಾಜರ್ ಆಸ್ಲಿ. ವೇದಿ ಕಾರ್ಯೆ ಭುರ್ಗ್ಯಾಂನಿ ಆನಿ ಶಿಕ್ಷಕಾಂನಿ ಚಲವ್ನ್ ವೆಲೆಂ. ಸಭಾ ಕಾರ್ಯಕ್ರಮಾ ಉಪ್ರಾಂತ್ ಭುರ್ಗ್ಯಾಂ ಥಾವ್ನ್ ಗಾಯನ್, ನ್ರತ್ಯ್ ಆನಿ ನಾಟ್ಕುಳೆ ಪ್ರದರ್ಶನ್ ಜಾಲೆಂ.