Friday 29th, March 2024
canara news

ಕೊಂಕಣಿ ಮಾನ್ಯತೋತ್ಸವ್ - ೨೫

Published On : 15 Feb 2018   |  Reported By : media release


ಕರ್ನಾಟಕ್ ಕೊಂಕಣಿ ಸಾಹಿತ್ ಅಕಾಡೆಮಿನ್, ಕೊಂಕಣಿ ಭಾಸ್ ಭಾರತಾಚ್ಯಾ ಸಂವಿಧಾನಾಚ್ಯಾ ಆಟ್ವ್ಯಾ ವೊಳೆರಿಂತ್ ಮೆಳವ್ನ್ ೨೫ ವರ್ಸಾಂ ಸಂಪಯಿಲ್ಲ್ಯಾಚೊ ತೀನ್ ದಿಸಾಂಚೊ ಸಂಭ್ರಮ್ (ಫೆಬ್ರೆರ್ ೧೦ ಥಾವ್ನ್ ೧೨ ಪರ್‍ಯಾಂತ್) ಭೋವ್ ಅಪುರ್ಭಾಯೆನ್ ದಾಂಡೇಲಿ ಶೆರಾಂತ್ಲ್ಯಾ ರಂಗನಾಥ ಆಡಿಟೋರಿಯಮಾಂತ್ ಚಲವ್ನ್ ವೆಲೊ.

ಮಾ|ಬಾ|ಗ್ರೆಗರಿ (ಅಂಬೆವಾಡಿ ಫಿರ್ಗಜೆಚೊ ವಿಗಾರ್) ಹಾಣೆಂ ಗುಮಟ್ ವ್ಹಾಜವ್ನ್ ಹ್ಯಾ ಸ್ಟಾಲಾಂಚೆಂ ಉಗ್ತಾವಣ್ ಕರುನ್ ’ಜೊ ಕೊಂಕ್ಣಿ ಮನಿಸ್ ಕೊಂಕ್ಣಿ ಉಲಯ್ನಾ, ತೊ ಅಪ್ಲ್ಯಾ ಆವಯ್‌ಚೆರ್ ಅಭಿಮಾನ್ ನಾತ್ಲೊ ಮನಿಸ್, ದೆಕುನ್ ಆಮ್ಕಾಂ ಆಮ್ಚೆ ಆವಯ್ಚೆರ್ ಅಭಿಮಾನ್ ಆಸಾ ತರ್, ಆಮಿ ಆವಯ್ನ್ ಶಿಕಯಿಲ್ಲಿ ಕೊಂಕ್ಣಿ ಭಾಸ್ ಕೆದಿಂಚ್ ವಿಸ್ರುಂಕ್ ನ್ಹಜೊ’ ಮ್ಹಣಾಲೊ.

ಉಪ್ರಾಂತ್ ಹ್ಯಾ ಸಂಭ್ರಮಾಚೆಂ ಕಾರ್ಯೆಂ ಕರ್ನಾಟಕ್ ಕೊಂಕ್ಣಿ ಸಾಹಿತ್ ಅಕಾಡೆಮಿಚೊ ಅಧ್ಯಕ್ಷ್ ಮಾನೆಸ್ತ್ ಆರ್.ಪಿ.ನಾಯ್ಕ್ ಹಾಂಚ್ಯಾ ಅಧ್ಯಕ್ಷ್‌ಪಣಾಖಾರ್, ಮುಖೆಲ್ ಸಯ್ರಿಂ ಜಾವ್ನ್ ಸಯ್ಯದ್ ಕೆ. ತಂಗಳ್, ರಾಧಾಕೃಷ್ಣ ಹೆಗ್ದೆ, ಡಾ|ವಿಧ್ಯಾ ಭಟ್ ತಶೆಂಚ್ ರೆಜಿಸ್ತ್ರಾರ್ ಡಾ|ದೇವ್‌ದಾಸ್ ಪೈ ವೆದಿಚೆರ್ ಉಪಸ್ಥಿತ್ ಆಸ್ಲೆ.

ಪರಿ-ಸಂವಾದ್ ಕಾರ್ಯಾಂತ್ ’ಕೊಂಕ್ಣಿ ಭಾಶೆಚಿ ರಾಷ್ಟ್ರೀಯ್ ಹಂತಾರ್ ಸ್ಥಾನ್-ಮಾನ್’ ಮ್ಹಳ್ಳೆ ವಿಶ್ಯಾಚೆರ್ ಮಾನೆಸ್ತ್ ಗೋಕುಲ್‌ದಾಸ್ ಪ್ರಭು, ವಲ್ಲಿ ಕ್ವಾಡ್ರಸ್ ತಶೆಂಚ್ ಪೂರ್ಣಾನಂದ ಚಾರಿ ಹಾಣಿಂ ಆಪ್ಲಿಂ ಉಲವ್ಪ್ ಪ್ರಸ್ತುತ್ ಕೆಲಿಂ.

ವೆವೆಗ್ಳ್ಯಾ ಕೊಂಕ್ಣಿ ಸಮುದಾಯಾಚ್ಯಾ ಲೊಕಾಂಥಾವ್ನ್ ವೆವೆಗ್ಳಿಂ ಸಂಗೀತ್-ಕಲಾ-ಸಾಂಸ್ಕೃತಿಕ್ ಕಾರ್‍ಯಿಂ, ನಾಟ್ಕುಳೊ, ಕೊಂಕ್ಣಿ ಫಿಲ್ಮ್ ’ಅಂತು’ ಹಾಚೆಂ ಪ್ರದರ್ಶನ್ ತಶೆಂಚ್ ಕರ್ನಾಟಕ್ ಕೊಂಕ್ನಿ ಸಾಹಿತ್ ಅಕಾಡೆಮಿಚೆ ವರ್ಸಾಳೆ ಪುರಸ್ಕಾರ್ ದೀಂವ್ಕ್ ರಾಜ್ಯಾಚೊ ಮಾಲ್ಘದೊ ಮಂತ್ರ್ ಮಾನೆಸ್ತ್ ಆರ್.ವಿ.ದೇಶ್‌ಪಾಂಡೆ ಹಾಜರ್ ಆಸ್ಲೊ.

ಜಿಣ್ಯೆ-ಆವ್ದೆಚೆ ಗೌರವ್ ಪುರಸ್ಕಾರ್ ನಾಮ್ಣೆಚೆ ಕೊಂಕ್ಣಿ ಸಾಹಿತಿ ಹೆರೊಲ್ಪಿಯುಸ್ (ಸಾಹಿತ್), ಓಂ ಗಣೇಶ್ (ಕಲಾ) ತಶೆಂಚ್ ಮಹಾದೇವ್ ವೇಳಿಪ (ಜಾನಪದ್/ಲೋಕ್‌ವೇದ್) ಹ್ಯಾ ತಿನಾಂಕ್ ಮಾನ್‌ಪತ್ರ್, ಫುಲಾಂ-ಫಳಾಂ, ಶೋಲ್, ಪೇಟ ಯಾದಿಸ್ತಿಕಾ ತಶೆಂಚ್ ಪನ್ನಾಸ್ ಹಜಾರ್ ರುಪಯ್ ಗೌರವ್ ಧನ್ ದಿಲೆ. ತಶೆಂಚ್ ೨೦೧೭ ವರ್ಸಾಚೆ ಪುಸ್ತಕ್ ಇನಾಮಾಕ್ ವಲ್ಲಿ ಕ್ವಾಡ್ರಸಾಚೊ ಪಾಂಚ್ವೊ ಮಟ್ವ್ಯಾ ಕಾಣ್ಯಾಂಚೊ ಜಮೊ ’ಬಂಧ್’ ತಶೆಂಚ್ ವಿಶ್ವನಾಥ್ ಶೇಟ್ ಹಾಂಚೊ ಶಟ್ಪದಿ ಮ್ಹಾ-ಕಾವ್ಯೆಂ ’ಶ್ರೀ ರಾಮಚರಿತ’ ಸಂಗ್ರಹಾಂಕ್ ವಿಂಚ್‌ಲ್ಲ್ಯಾನ್, ಮಾನ್-ಪತ್ರ್, ಶೋಲ್, ಫುಲಾಂ-ಫಳಾಂ, ಯಾದಿಸ್ತಿಕಾ ತಶೆಂಚ್ ಪಂಚ್ವೀಸ್ ಹಜಾರ್ ರುಪ್ಯಾಂಚೆಂ ಇನಾಮ್ ದಿಲೆಂ.

ಪುರಸ್ಕೃತಾಂ ತರ್ಫೆನ್ ಹೆರೊಲ್ಪಿಯುಸ್ ಉಲವ್ನ್, ಕೊಂಕ್ಣಿ ಭಾಸ್ ಸೊಭಿತ್, ರುಚಿಕ್ ಆನಿ ಮೊವಾಳ್ ದೆಕುನ್ ತಿ ಭಾಸ್ ಸಮೇಸ್ತಾನಿ ವ್ಹಡ್ ಅಭಿಮಾನಾನ್ ಉರಂವ್ಚಿ ಗರ್ಜ್ ಮ್ಹಣುನ್ ಸಾಂಗ್ಲೆಂ. ತಶೆಂಚ್ ಪುಸ್ತಕ್ ಪುರಸ್ಕೃತಾಂ ತರ್ಫೆನ್ ವಲ್ಲಿ ಕ್ವಾಡ್ರಸಾನ್ ಅಪ್ಲ್ಯಾ ಉಲವ್ಪಾಂತ್ ’ಸಮಾಜೆಕ್ ಫುಟಂವ್ಚ್ಯಾ ಸಕ್ತೆವಿರೋದ್’ ಸಮಾಜೆಕ್ ಲಾಗಿಂ ಹಾಡುಂಕ್ ಆನಿ ’ಮನ್ಶಾಂ ಮೌಲ್ಯಾಂಕ್’ ಉಕ್ಲುನ್ ಧರ್ಚೆ ದಿಶೆನ್ ಎಕೆಕ್ಲ್ಯಾ ಸಾಹಿತಿಕ್ ಅಪ್ಲಿ ಜವಾಭ್ದಾರಿ ಘೆವ್ನ್ ತ್ಯೇ ದಿಶೆನ್ ವಾವ್ರ್ ಕರುಂಕ್ ಉಲೊ ದಿಲೊ.

ಮುಖೆಲ್ ಸಯ್ರೆ ಜಾವ್ನ್ ಹಾಜರ್ ಆಸ್ಲೆ ಮಾನೆಸ್ತ್ ಬಸ್ತಿ ವಾಮನ್ ಶೆಣಯ್ ಹಾಣಿಂ ’ಕೊಂಕ್ಣೆಂತ್ ಚಡಿತ್ ಆನಿ ಚಡಿತ್ ಬೂಕ್ ಪರ್ಗಟುನ್ ಯೇಂವ್ಕ್ ಜಾಯ್’ ಮ್ಹಣುನ್ ಉಲೊ ದಿಲೊ. ತೀನ್ ದಿಸಾಂಚ್ಯಾ ಕಾರ್ಯಾಂತ್ ತಿಸ್ರೆ ದಿಸಾ ಕೊಂಕ್ಣೆಚ್ಯಾ ವೆವೆಗ್ಳ್ಯಾ ಶೆತಾಂತ್ ದೇಣ್ಗಿ ದಿಲ್ಲ್ಯಾ ಪಂಚ್ವೀಸ್ ಮಾನೆಸ್ತಾಂಕ್ ಸಮ್ಮಾನ್ ಕೆಲೊ.




More News

ಮಾ.24 ; ಸ್ವಸ್ತಿಕ್ ಫ್ರೆಂಡ್ಸ್ ಕ್ಲಬ್ ಪುಂಜಾಲಕಟ್ಟೆ ಇದರ 40ನೇ ಸಂಭ್ರಮಾಚರಣೆ
ಮಾ.24 ; ಸ್ವಸ್ತಿಕ್ ಫ್ರೆಂಡ್ಸ್ ಕ್ಲಬ್ ಪುಂಜಾಲಕಟ್ಟೆ ಇದರ 40ನೇ ಸಂಭ್ರಮಾಚರಣೆ
*ಸೌಹಾರ್ದ ಕಾರ್ಯಕ್ರಮಗಳಿಂದ ಮಾತ್ರವೇ ಸ್ವಾಸ್ಥ್ಯ ಸಮಾಜದ ನಿರ್ಮಾಣ ಸಾಧ್ಯ - ಬಶೀರ್ ಮದನಿ*
*ಸೌಹಾರ್ದ ಕಾರ್ಯಕ್ರಮಗಳಿಂದ ಮಾತ್ರವೇ ಸ್ವಾಸ್ಥ್ಯ ಸಮಾಜದ ನಿರ್ಮಾಣ ಸಾಧ್ಯ - ಬಶೀರ್ ಮದನಿ*
 ಕರ್ನಾಟಕ ಜಾನಪದ ಪರಿಷತ್ತು ಮಹಾರಾಷ್ಟ್ರ ಘಟಕ ದ್ವಿತೀಯ ವಾರ್ಷಿಕೋತ್ಸವ
ಕರ್ನಾಟಕ ಜಾನಪದ ಪರಿಷತ್ತು ಮಹಾರಾಷ್ಟ್ರ ಘಟಕ ದ್ವಿತೀಯ ವಾರ್ಷಿಕೋತ್ಸವ

Comment Here