ಮಂಗಳೂರು: ಮಂಗಳೂರು ನಗರದಲ್ಲಿ ನೀರಿನ ಸಮಸ್ಯೆ ದಿನೇ ದಿನೇ ಹೆಚ್ಚುತ್ತಿದೆ. ತುಂಬೆ ಡ್ಯಾಂನಲ್ಲಿ ಶುಕ್ರವಾರ 8 ಅಡಿ 3 ಇಂಚು ನೀರು ಮಾತ್ರ ಲಭ್ಯವಿದ್ದು, ಇದು ಇನ್ನು ಕೇವಲ 8 ದಿನಗಳಿಗೆ ಮಾತ್ರ ಲಭ್ಯವಾಗುವ ನೀರಿದ್ದು, ಮಂಗಳೂರಿಗರಲ್ಲಿ ಆತಂಕ ಮನೆ ಮಾಡಿದೆ. ಕಳೆದ ವರ್ಷ ಎ. 22ಕ್ಕೆ ತುಂಬೆ ಡ್ಯಾಂನಲ್ಲಿ 12 ಅಡಿ 5 ಇಂಚು ನೀರು ಲಭ್ಯವಿತ್ತು. ಆದ್ರೆ, ಈ ಬಾರಿ ನೀರಿನ ಪ್ರಮಾಣ ಕಡಿಮೆಯಾಗಿದೆ.
ಮಂಗಳೂರು ನಗರಕ್ಕೆ ಪ್ರತಿನಿತ್ಯ 160 ಎಂಎಲ್ಡಿ, ಉಡುಪಿ ನಗರಕ್ಕೆ ಪ್ರತಿನಿತ್ಯ 29 ಎಂಎಲ್ಡಿ ಪ್ರಮಾಣದ ನೀರಿನ ಅವಶ್ಯಕತೆಯಿದೆ. ಆದರೆ ನೀರಿನ ಮಟ್ಟ ದಿನೇದಿನೇ ಕುಸಿಯುತ್ತಿರುವುದರಿಂದ ಕಳೆದ ಬುಧವಾರದಿಂದ ಮಂಗಳೂರು ನಗರಕ್ಕೆ ಎರಡು ದಿನಕ್ಕೊಮ್ಮೆ ನೀರು ಕೊಡಲಾಗುತ್ತಿದೆ. ದ.ಕ.ಜಿಲ್ಲೆಯ ಗ್ರಾಮೀಣ ಭಾಗದಲ್ಲೂ ನೀರಿನ ಅಭಾವ ಕಾಡಿದೆ.
