ಕುಂದಾಪುರಾಂತ್ ಕೊಲ್ಕೊತ್ತಾಚಿ ಸಾಂತಿಣ್ ಸಾಂತ್ ತೆರೆಜಾಕ್ ಮಾನ್

ಕುಂದಾಪುರ್, ಸೆ.5: ಕೊಲ್ಕೊತಾಂತ್ ದುಬ್ಳ್ಯಾ ದಾಕ್ಟ್ಯಾಂಚಿ, ಪೀಡೆಸ್ತಾಂಚಿ ನಿರ್ಗತಿಕಾಂಚಿ ಸೇವೆ ಖಾತಿರ್ ಆಪ್ಲಿ ಜಿಣಿ ಸಮರ್ಪಿತ್ ಕೆಲ್ಯಾ ಮದರ್ ತೆರೆಜಾಕ್ ಪಾಪಾ ಫ್ರಾನ್ಸಿಸಾನ್ ವ್ಯಾಟಿಕನ್ ಶಹರಾಂತ್ ಸಾಂತಾಚಿ ಪದ್ವಿ ದಿಲ್ಯಾಕ್ ಆನಿ ತಿಚ್ಯಾ ಪುಣ್ಯ ಸ್ಮರಣಾಕ್ ಲಾಗೊನ್ ಸಾಂತ್ ತೆರೆಜಾಚ್ಯಾ ಮಾನಾ ಪಾಸೊತ್ ಕುಂದಾಪುರ್ ರೊಜಾರ್ ಮಾಯೆಚ್ಯಾ ಮಂದಿರಾಂತ್ ಸಂಭ್ರಮಿಕ್ ಪವಿತ್ರ್ ಬಲಿದಾನ್ ಭೆಟಯ್ಲೆಂ.

ಪ್ರಧಾನ್ ಯಾಜಕ್ ಜಾಂವ್ನ್ ವಿಗಾರ್ ಮಾ|ಬಾ|ಅನಿಲ್ ಸೋಜಾನ್ ಪವಿತ್ರ್ ಬಲಿದಾನ್ ಭೆಟವ್ನ್ ‘ಸಾಂತ್ ತೆರೆಜ್ ದುಬ್ಳ್ಯಾ ದಾಕ್ಟ್ಯಾಂಚ್ಯಾ ಸೇವೆಂತ್ ಜೆಜು ಕ್ರಿಸ್ತಾಕ್ ದೆಖ್ಲೆಂ. ಆನಿ ಆಖ್ಖಿ ಜಿಣಿ ತಿಣೆ ದುಬ್ಳ್ಯಾ ದಾಕ್ಟ್ಯಾಂ ಖಾತಿರ್ ಸಮರ್ಪಿಲಿ. ದುಬ್ಳ್ಯಾ ದಾಕ್ಟ್ಯಾಂಚಿ ಸೇವಾ ಕೆಲ್ಯಾರ್ ಕ್ರಿಸ್ತಾಚೊ ಮೋಗ್ ಕೆಲ್ಯಾ ಬರಿ ಮ್ಹಣನ್ ಆಮ್ಕಾಂ ತಿಣೆ ಮಾರ್ಗದರ್ಶನ್ ದಿಲ್ಯಾ, ಹ್ಯಾ ಸೇವೆ ವರ್ವಿಂ ತಿಕಾ ಸರ್ಗಿಂಚೆ ರಾಜ್ ಫಾವೊ ಜಾಲೆಂ. ಸರ್ಗಿಂಚೆ ರಾಜ್ ಕಶೆಂ ಅಪ್ಣಾಯೆತ್ ಮ್ಹಳೆಂ ತಿಣೆ ಆಮ್ಕಾಂ ಶಿಕಯ್ಲಾ ಆಸ್ತಾಂ, ತಿ ಜಾವ್ನಾಸಾ ಎಕ್ ಖರಿ ಶಿಕ್ಷಕಿ’ ಮ್ಹಣನ್ ತಾಣಿ ಸಂದೇಶ್ ದಿಲೊ.

ಮಾ|ಬಾ|ಜೆರಾಲ್ಡ್ ಸಂದೀಪ್ ಡಿಮೆಲ್ಲೊನ್ ಸಹ ಭೆಟವ್ಣಿ ಕೆಲಿ. ಹ್ಯಾ ಸಂಬ್ರಮಾಕ್ ಅಧಿಕ್ ಮಾಪಾನ್ ಫಿರ್ಗಜೆಚೆಂ ಭವಾಡ್ತಿಕ್ ಹಾಜರ್ ಆಸ್ಲೆಂ. ಗೊವ್ಳಿಕ್ ಮಂಡಳಿಚೆಂ ಸಾಂದೆ, ಫಿರ್ಗಜ್ ಉಪಾಧ್ಯಕ್ಷ್ ಕಾರ್ಯದರ್ಶಿ, ತಶೆಂಚ್ ಸಭಾರ್ ಧರ್ಮ್ ಭಯ್ಣ್ಯೊ ಹ್ಯಾ ಕಾರ್ಯಾಕ್ ಹಾಜಾರ್ ಆಸ್ಲೆಂ. ಹ್ಯಾ ಸರ್ವ್ ಭವಾಡ್ತ್ಯಾನಿಂ, ಸಾಂತ್ ತೆರೆಜಾಚ್ಯಾ ಪಿಂತುರಾಕ್ ಫುಲಾಂ ಅರ್ಪುನ್ ಮಾನ್ ಕೆಲೊ.

ಭಾರಾತಾಂತ್ ಶಿಕ್ಷಕಾಂಚೊ ದಿಸಾಚ್ ಸಾಂತ್ ತೆರೆಜ್ ದೆವಾಧಿನ್ ಜಾಲ್ಲಿ. ಆನಿ ಎಕಾ ದಿಸಾ ಪಯ್ಲೆಂ ತಿಕಾ ಸಾಂತಿಣಿಚೊ ಮಾನ್ ಲಾಭ್ಲೊ. ತಿಣೆ ದುಬ್ಳ್ಯಾ ದಾಕ್ಟ್ಯಾಂಚಿ ಸೇವಾ ಕರ್ಚ್ಯಾ ಪಯ್ಲೆಂ. ತಿಣೆ ಧರ್ಮ್ ಭಯ್ಣಿಚೊ ಭೇಸ್ ಅಪ್ಣಾಂವ್ನ್ ತಿಣೆ 17 ವರ್ಸಾಂ ಶಿಕ್ಷಕಿ ಜಾವ್ನ್ ವಾವುರ್ಲಿ ಮ್ಹಣ್ತಾನಾ, ತಿ ಎಕ್ ಮುಳಾವಿ ಶಿಕ್ಷಕಿ ಜಾವ್ನಾಸ್ಲಿಂ. ತಿ ಸರೊನ್ (1997) 19 ವರ್ಸಾಂ ಉಪ್ರಾಂತ್ ತಿಚ್ಯಾ ಥಾವ್ನ್ ದೋನ್ ಅಜಾಪಾಂ 2002 ಇಸ್ವೆಂತ್ ಭಾರತಾಚಿ ಸ್ತ್ರೀ ಮೊನಿಕಾ ಬೆಸ್ರಾ ಅಂಡಾಶಯ ಕ್ಯಾನ್ಸರ್ ಪೀಡೆಂತ್ ಪಡ್ಲಿ, ತಿಣೆ ಸಾಂತ್ ತೆರೆಜಾಲಾಗಿಂ ಮಾಗ್ತೆರ್ ತಿ ಬರಿ ಜಾಲಿ. ಆನ್ಯೇಕ್ 2008 ಇಸ್ವೆಂತ್ ಬ್ರೆಜಿಲ್ ದೇಶಾಚೊ ಮಾರ್ಸಿಲ್ಲೊ ಹಡ್ಡಾಡ್ ಆ್ಯಂಡ್ರಿನೊಚ್ಯಾ ಮೆಂದ್ವಾ ಭಿತರ್ ಟ್ಯುಮರ್ ಜಾಲ್ಲೊ, ತಾಚ್ಯಾ ಪತಿಣೆನ್ ಸಾಂತ್ ತೆರೆಜಾಲಾಗಿಂ ಮಾಗ್ತೆರ್ ಟ್ಯುಮರ್ ನಿವಾರಣ್ ಜಾಲೊ. ಅಶೆಂ ಸಾಂತಾಚಿ ಪಧ್ವಿ ಮೆಳ್ಚ್ಯಾ ಪ್ರಕ್ರಿಯಾ ಸುಫಳ್ ಜಾಂವ್ನ್ ತಿಕಾ ಸಾಂತಿಣಿಚೊ ಮಾನ್ ಪಾಪಾ ಥಾವ್ನ್ ಮೆಳ್ಳೊ.

ಸಾಂ. ತೆರೆಜಾಚೊ ಜಲ್ಮ್ 1910 ಮೆಸಡೋನಿಯಾಚೆ, ಸ್ಕೋಪ್ಜೆಂತ್ ಜಾಲೆಂ. 1929 ಇಸ್ವೆಂತ್ 18 ವರ್ಸಾಂ ಪ್ರಾಯೆರ್ ತಿ ಭಾರತಚಾ ಕೊಲ್ಕೊತ್ತಾಕ್ ಆಯ್ಲಿ. 1931 ಇಸ್ವೆಂತ್ ಧರ್ಮ್ ಭಯ್ಣಿಚಿ ದೀಕಾ ತಿಣ್ಷೆ ಅಪ್ಣಾಯ್ಲಿ.

1931 ಥಾವ್ನ್ 1948 ಮ್ಹಣಾಸರ್ ಕೊಲ್ಕೊತಾಚ್ಯಾ ಸೈಂಟ್ ಮೇರಿ ಹೈಸ್ಕೂಲಾಂತ್ ತಿ ಶಿಕ್ಷಕಿ ಜಾವ್ನ್ ವಾವುರ್ಲಿ. 1946 ಇಸ್ವೆಚ್ಯಾ ಎಕಾ ದಿಸಾ ಕೊಲ್ಕೊತ್ತಾ ಥಾವ್ನ್ ಡಾರ್ಜಿಲಿಂಗಾಕ್ ರೈಲಾರ್ ಪಯ್ಣ್ ಕರ್ತಾನಾ, ರೈಲಾಂತ್ ದುಬ್ಳ್ಯಾಂಕ್, ಪೀಡೆಸ್ತಾಂಕ್ ಪಳೆವ್ನ್ ತಿಚೆಂ ಮನ್ ಪರಿವರ್ತನ್ ಜಾಲೆಂ. ತಿಣೆ ದುಬ್ಳ್ಯಾ ದಾಕ್ಟ್ಯಾಂಚಿ ಸೇವಾ ಕರುಂಕ್ ನಿರ್ಧಾರ್ ಘೆತ್ಲೊ ಆನಿ ಕೊಲ್ಕೊತ್ತಾಚ್ಯಾ ಹೋಲಿ ಫ್ಯಾಮಿಲಿ ಆಸ್ಪತ್ರೆಂತ್ ಶುಸುಶ್ಯ್ರಾ ಕರ್ಚಿಂ ತರ್ಬೆತಿ ಜೊಡ್ನ್ ಘೆತ್ಲಿ.

1950 ಇಸ್ವೆಂತ್ ಪಾಪಾ ಸಾಯ್ಬಾಚಿ ಪರ್ವಣ್ಗಿ ಘೆಂವ್ನ್ ಮಿಷನರಿಸ್ ಆಫ್ ಚಾರಿಟಿ ಮೇಳ್ ಆರಂಭ್ ಕರ್ನ್, ಕೇವಲ್ 13 ಜಣಾಂ ಸಿಸ್ಟರಾಂ ಸವೆಂ ದುಬ್ಳ್ಯಾ ದಾಕ್ಟ್ಯಾಂಚಿ ಸೇವಾ ಆರಂಭ್ ಕೆಲಿಂ. ಆನಿ ಆಜ್ ಸಂಸಾರ್ ಭರ್ ಸಾಂತ್ ತೆರೆಜ್ ಮೇಳಾಚೆಂ ಶಾಖೆ ಜಾಲ್ಯಾತ್ ಆನಿ ಅಪಾರ್ ಸಂಖ್ಯಾನ್ ಧರ್ಮ್ ಭಯ್ಣೊ, ತಶೆಂ ಹ್ಯಾಚ್ ಮೆಳಾಚ್ಯೊ ಧರ್ಮ್ ಭಾವ್ ಸೇವಾ ದಿವ್ನ್ ಆಸಾತ್.

ಹಿಕಾ ಫಾವೊ ಜಾಲ್ಯೊ ಗೌರವ್
ಪದ್ಮಶ್ರಿ
ಭಾರತ ರತ್ನ
ರೇಮನ್ ಮ್ಯಾಗ್ಸೆಸೆ
ನೊಬೆಲ್ ಶಾಂತಿ ಪುರಸ್ಕಾರ್
ಆನಿ ಆತಾಂ ಸರ್ವ್ ಶ್ರೇಸ್ಟ್ ಸಾಂತಾಚಿ ಪದ್ವಿ
- ಬರ್ನಾಡ್ ಜೆ.ಕೋಸ್ತಾ, ಕುಂದಾಪುರ್

---

---

---

More News

---