ಕುಂದಾಪುರ್ ರೊಜಾರ್ ಮಾಯೆಚ್ಯಾ ಇಗರ್ಜೆ ನಿಮಾಣ್ಯಾ ಜೆವ್ಣಾಚೊ ಸಂಭ್ರಮ್

ಕುಂದಾಪುರ್: ಕುಂದಾಪುರ್ ರೊಜಾರ್ ಮಾಯೆಚ್ಯಾ ಇಗರ್ಜೆ ನಿಮಾಣ್ಯಾ ಜೆವ್ಣಾಚೊ ಸಂಭ್ರಮ್ ಚಲ್ಲೊ. ಸಾಂಜೆಚ್ಯಾ ಸವ್ ವೊರಾರ್ ಮಾ|ಬಾ|ವಿ|ವಾರ್ ಅನಿಲ್ ಡಿ’ಸೋಜ್ ಹಾಂಚ್ಯಾ ಮುಖೇಲ್ಪಣಾರ್ ಧಾರ್ಮಿಕ್ ವಿದಿ ಚಲ್ಲಿ.

ಪಯ್ಲ್ಯಾ ಭಾಗಾಂತ್ ವಾಚಾಪ್, ಶೆರ್ಮಾಂವ್ ಆಸೊನ್ ಮಾ|ಬಾ|ವಿ|ವಾರ್ ಅನಿಲ್ ಸೋಜಾನ್ ‘ಆಜ್ ಜೆಜುನ್ ಎವ್ಕರಿಸ್ತ್ ಘಡುನ್ ಹ್ಯಾ ಉಂಡ್ಯಾ ರೂಪಾಖಾಲ್ ತುಮ್ಚ್ಯಾ ಸವೆಂ ಅಸಾ ಮ್ಹಣನ್ ವಾಗ್ದಾನ್ ಕೆಲ್ಲೊ ದೀಸ್. ಹೊ ಉಂಡೊ ಆಮ್ಕಾಂ, ಸರ್ಗಿಂಚ್ಯಾ ರಾಜಾಕ್ ವರ್ನ್ ಪಾವಯ್ತಾ. ದೆಕುನ್ ಹೊ ವೇಳ್ ಸಂತೊಸ್, ಮೋಗ್ ಆನಿ ಮಯ್ಪಾಸಾಚೊ ಜಾವ್ನಾಸಾ. ಎವ್ಕರಿಸ್ತಾಂತ್ಲೊ ಜೆಜು, ಸರ್ವ್ ಆಮಿ ಜೆಜು ಥಂಯ್ ಕೇಂದ್ರಿತ್ ಜಾಯ್ಜೆ, ಆಮಿ ಎಕಾಮೆಕಾ ಭಾವ ಭಯ್ಣಿ ಬರಿ ಮೊಗಾನ್ ಏಕ್ವಟಾನ್ ಜಿಯೆಜೆ ಮ್ಹಣನ್ ಉಲೊ ದಿತಾಂ. ತಶೆಂಚ್ ಯಾಜಾಕಿ ಸಂಸ್ಕಾರ್ ಘಡ್ಲೊ ವಿಶೇಸ್ ದೀಸ್. ಯಾಜಕ್ ಮ್ಹಳ್ಯಾರ್ ದೆವಾಚೊ ಮನಿಸ್, ತೊ ದೆವಾನಂಚ್ ವಿಂಚುನ್ ಕಾಡ್ಲೊಲೊ ಜಾವ್ನಾಸಾ. ದೆಕುನ್ ಯಾಜಾಕಾಂಕ್ ಮಾನ್, ಮೋಗ್ ದಿಯಾ, ತಾಂಚೆರ್ ಅಭಿಮಾನ್ ಧವರಾ, ಜೆಜುನ್ ಮ್ಹಳೆಂ ಹಾಂವ್ ಆಯ್ಲ್ಯಾ ಸೇವಾ ಘೆಂವ್ಕ್ ನ್ಹಯ್, ಬಗಾರ್ ಸೇವಾ ದಿಂವ್ಕ್, ತಶೆಂ ತುಮಿ ಹೆರಾಂಚಿ ಸೇವಾ ಕರಿಜೆ ಮ್ಹಣನ್ ಉಪದೇಶ್ ದಿಲ್ಲೊ ದೀಸ್. ತಶೆಂ ಆಮಿಯಿ ದುಬ್ಳ್ಯಾ ದಾಕ್ಟ್ಯಾಂಚಿ, ಗರ್ಜೆವಂತಾಚಿ ಸೇವಾ ಕರಿಜೆ’ ಮ್ಹಣನ್ ವಿಗಾರ್ ಬಾಪಾನ್ ಸಂದೇಶ್ ದಿಲೊ.

ಉಪ್ರಾಂತ್ ವಿಗಾರ್ ಬಾಪಾನ್ ನೇಮಿಯಾರ್ಲ್ಯಾ ಸಾಂದ್ಯಾಚೆ ಪಾಂಯ್ ಧುಲೆ, ತಿಸ್ರೊ ಭಾಗ್ ಜಾಂವ್ನ್ ಉಂಡ್ಯಾ ವಾಯ್ನಾ ದ್ವಾರಿಂ ಸಾಕ್ರಿಪಿಸ್ ಭೆಟಂವ್ಚ್ಯಾ ಕ್ರಿಸ್ತ್ ಪ್ರಸಾದಾಚಿ ರೀತ್ ಚಲ್ಲಿ. ಅಶೆಂ ತಿದೊಡೊ ಸಂಭ್ರಮ್ ಆಚರಣ್ ಆಚರ್ಸಿಲೊ. ಸಹಾಯಕ್ ವಿಗಾರ್ ಮಾ|ಬಾ| ಜೆರಾಲ್ಡ್ ಸಂದೀಪ್ ಡಿಮೆಲ್ಲೊನ್ ಧಾರ್ಮಿಕ್ ವಿಧಿಂತ್ ಸಂಗಾತ್ ದಿಲೊ. ಉಪ್ರಾಂತ್ ಕ್ರಿಸ್ತ್ ಪ್ರಸಾದ್ ಭಕ್ತಿನ್ ವಿಶೆವಾಚ್ಯಾ ಅಲ್ತಾರಾರ್ ವ್ಹರ್ನ್ ಧವರ್ಲೊ. ಆಕ್ರೇಕ್ ಸಾಂಕ್ರಾಮೇತಾಂಚೆ ಆರಾಧನ್ ಚಲ್ಲೆಂ. ಹೆಂ ಆರಾಧನ್ ಸಾಂ.ಜುಜೆ ಕೊವೆಂತಾಚ್ಯಾ ಧರ್ಮ್ ಭಯ್ಣಿನಿ ಚಲವ್ನ್ ವೆಲೆಂ.

 

---

---

---

More News

---