ಮುಂಬಯಿ,(ಆರ್‍ಬಿಐ) ನ.24: ಅಂಧೇರಿ ಪಶ್ಚಿಮದ ಮಧುವನ್ ನಿವಾಸಿ ಸಾಹಿತಿ, ಮುಂಬಯಿ ಮಹಾನಗರ ಪಾಲಿಕೆಯ ಕನ್ನಡ ಶಾಲೆಯ ನಿವೃತ್ತ ಶಿಕ್ಷಕಿ ಶ್ರೀಮತಿ ಮೇರಿ ಬಿ.ಪಿಂಟೊ(84.) ಅವರು ಗುರುವಾರ (ನ.23)ರಂದು ಅಲ್ಪಕಾಲದ ಅನಾರೋಗ್ಯದಿಂದ ಸಾಂತಾಕ್ರೂಜ್ ಪೂರ್ವದ ಕಲೀನಾದಲ್ಲಿರುವ ಪುತ್ರನ ಸ್ವಗೃಹದಲ್ಲಿ ನಿಧನರಾದರು.
ಮೂಲತಃ ದಕ್ಷಿಣ ಕನ್ನಡದ ಕಾರ್ಕಳ್ ಮಿಯಾರ್‍ನವರಾಗಿದ್ದು, ಮುಂಬಯಿ ಮಹಾನಗರ ಪಾಲಿಕೆಯ ಕನ್ನಡ ಶಾಲೆಯಲ್ಲಿ ಮೂರುವರೆ ದಶಕಗಳ ಕಾಲ ಶಿಕ್ಷಕಿಯಾಗಿ ಸೇವೆ ಸಲ್ಲಿಸಿದರು. ಅವರು ಅಂಧೇರಿಯಲ್ಲಿ ಎರಡು ಕನ್ನಡ ಶಾಲೆ ಮತ್ತು ಒಂದು ತೆಲುಗು ಶಾಲೆಯನ್ನು ಪ್ರಾರಂಭಿಸುವಲ್ಲಿ ಇವರ ಶ್ರಮ ಅಪಾರವಾಗಿದ್ದು, 1996 ರಲ್ಲಿ ಬೃಹನ್‍ಮುಂಬಯಿ ಮಹಾನಗರ ಪಾಲಿಕೆ ಶಿಕ್ಷಣ ವಿಭಾಗವು ನೀಡುವ ಉತ್ತಮ ಶಿಕ್ಷಕಿ ಮಹಾಪೌರ ಪ್ರಶಸ್ತಿಯನ್ನು ಇವರಿಗೆ ನೀಡಿ ಗೌರವಿಸಿದೆ. ಮೃತರು ಮೂರು ಸುಪುತ್ರ, ಓರ್ವ ಸುಪುತ್ರಿ, ಅಪಾರ ಬಂಧು ಬಳಗವನ್ನು ಅಗಲಿದ್ದರೆ.
